İş adamı: “Rəqabət mühiti olmadıqca...”

Bakı/25.05.21/Turan:  Azərbaycanda real sahibkarlığın inkişaf yolunda əsas problem rəqabətli mühitin olmamasıdır. Bunu keçmiş deputat, iş adamı Nazim Bəydəmirli mayın 25-də Turan-ın “Çətin sual” proqramının “Korrupsiyalaşmış, yoxsa fəaliyyətinə kölgə salınan Gömrük Xidməti?” adlı buraxılışında bildirib.

Məsələnin mahyyəti budur ki, baş prokuror yanında Korrupsiyaya Qarşı Mübarizə Baş İdarəsi mayın 17-də Bakı Baş Gömrük İdarəsində əməliyyat keçirib. Nəticədə idarənin vəzifəli şəxsləri  Elmar Mirzəyev, Emin Xəlilov, Mirağa Ağayev, Ceyhun Şabanov və Aydın Eylazov şübhəli şəxs qismində tutulublar.

Dövlət Gömrük Komitəsinin sədri Səfər Mehdiyev isə deyir ki, bəzi dairələr məsələni kontekstdən çıxarmağa, bu qəbildən olan neqativ halların gömrük orqanlarında guya kütləvi hal aldığına dair rəy formalaşdırmaqla gömrük xidmətinin fəaliyyətinə kölgə salmağa çalışırlar.

Komitənin fəaliyyəti barədə danışan Bəydəmirli hesab edir ki, qurumun fəaliyyəti digər qurumlardan o qədər də fərqlənmir,  bu qurum barədə xalq içində mənfi imic yaranıb. Onun fikrincə, komitədə institusional islahatlar getmədiyi üçün köklü islahatlar da aparılmayıb.

İş adamı yada salır ki, ilyarım öncə indiki komitə sədri inhisarı dəstəkləyən çıxış etmişdi, odur ki, hələ o zaman vəzifədən getməli idi. Onun fikrincə, burada çıxış yolu komitənin Vergi Xidmətilə birləşdirilməsi, bir mərkəzdən idarə edilməsi ola bilər.

İş adamı hesab edir ki, ölkədə real sahibkarlığın inkişaf edə bilməməsinin səbəblərindən biri də komitənn fəaliyyətini düzgün qurmamasıdır. Onun deməsinə görə, burada məmur sahibkarlığı əlverişli şəraitdədir. Azad sahibkarlar mallarını anbarlara yığmalıdırlar ki, bu anbarlar da məmurlara aiddir, buradakı xərclər də çox yuxarıdır.

Odur ki, gətirilən malların qiyməti bahalaşır, bazara daxil olanda da qiymət artımı baş verir, bunun ağır nəticəsini istehlakçı xalq şəkir, daha çox pul xərcləyir: “İqtisadi rəqabətliliyin olmamasıdır ki, idxal qiymətlərində 27-30 faiz bahalaşma var. Əgər ölkəyə 60 faizdən yuxarı idxal malı daxil olursa, bu zaman ölkə daxilində 3-4 faiz bahalaşmadan danışmaq inandırıcı görünmür. Bir sözlə, komitə qiymət artımına şərait yaradır. Komitənin sahibkara davranışı  bir növ orta əsr davranışlarını xatırladır. Odur ki, komitənin fəaliyyəti sahibkarların işini asanlaşdırmır, əksinə daha da çətinləşdirir”.

Bəydəmirliyə görə, rəqabət mühiti yaradılmadıqca, institusional islahatlar olmadıqca ölkədə sahibkarlığın inkişafında ciddi uğurlar qazanmaq mümkün olmayacaq.-05B-