Qarabağda Rusiya “sülhməramlıları”nın yerləşdirilməsinə razılıq verilməsi ciddi səhvdir

Bakı/12.08.21/Turan: Avqustun 11-də Azərbaycan Müdafiə Nazirliyi Rusiyaya xəbərdarlıq edib ki, Azərbaycan prezidenti, Rusiya prezidenti və Ermənistan baş nazirinin 10 noyabr 2020-ci il tarixli üçtərəfli bəyanatına baxmayaraq, Rusiya sülhməramlı qüvvələri Ermənistan Silahlı Qüvvələrinin Azərbaycan ərazilərində yerləşməsinə son qoymayıb.

Həmin gün İran İslam Respublikasının Azərbaycandakı səfiri Xarici İşlər Nazirliyinə dəvət olunub və İrana məxsus yük maşınlarının Qarabağa qanunsuz daxil olması ilə əlaqədar ona nota təqdim edilib.

Müsavat Partiyasının lideri Arif Hacılı "Çətin sual" proqramında gündəlikdəki bu və digər məsələlər barədə danışıb.

Onun sözlərinə görə, bu, gecikmiş hərəkətlərdir. Azərbaycan tərəfi lap əvvəldən yanlış siyasət yürüdüb. Bu siyasət nəticəsində biz indi çox mürəkkəb vəziyyətdəyik. Ermənistan Silahlı Qüvvələri Rusiyanın "sülhməramlıları”nın xəbəri və iştirakı olmadan necə yerləşə bilərdi?

Üçtərəfli sazişin birinci bəndi məhz Rusiya sülhməramlı kontingentinin yerləşdirilməsilə eyni vaxtda Ermənistan Silahlı Qüvvələrinin Qarabağ ərazisindən çıxarılması idi. Bu bəyanat yayıldıqdan üç saat sonra" sülhməramlılar " Qarabağ ərazisinə yeridildi, lakin erməni qüvvələri oradan çıxarılmadı.

Mahiyyətcə, bu saziş erməni Silahlı Qüvvələrinin xilası idi. Xankəndinin götürülməsi 3-4 saatlıq iş idi və bunun nəticəsində 20-22 minlik erməni dəstəsi mühasirəyə düşmüş olardı. Sazişdən istifadə edən Ermənistan özünün dağınıq, ruhdan düşmüş qoşunlarını Qarabağdan çıxardı, sonra isə həmin hissəni komplektləşdirmək və gücləndirmək üçün vaxt qazanaraq yenidən Qarabağa göndərir.

Hacılının fikrincə, üçtərəfli saziş bağlanarkən Qarabağda rusiyalı sülhməramlıların yerləşdirilməsinə razılıq verilməməliydi. "Bu, ciddi səhvdir və Qarabağda baş verən proseslər Azərbaycanın qarşılaşacağı problemlərin yalnız başlanğıcıdır", - hesab edir.

İran vətəndaşlarının və bu vətəndaşlara, hətta İran dövlətinə məxsus nəqliyyatın Qarabağa qanunsuz daxil olmasına gəlincə, Hacılı hesab edir ki, burada Rusiyanın da günahı az deyil. “Əgər Rusiya və İran arasında bu məsələ ilə bağlı razılıq əldə edilməsəydi, İran yük maşınları və işgüzar adamları Rusiya "sülhməramlı kontingenti"nin nəzarətində olan ərazilərə daxil ola bilməzdilər", - o vurğulayıb.—0—