Devlet Bahçeli iqtidarı bu dəfə də sarsıda biləcəkmi?

2016- cı ilin oktyabrından bəri AKP iqtidarını qeydsiz-şərtsiz dəstəkləyən və hətta ölkənin siyasi rejiminin dəyişdirilməsində baş rolu oynayan Milliyyətçi Hərəkat Partiyasının (MHP) lideri Devlet Bahçelinin "ümumi əfv" məsələsində prezident Erdoğan ilə ulduzunun barışmadığı artıq hamıya məlum oldu.

Bahçelinin təkidi və inadıyla 6 aydan bəri Türkiyənin gündəmini məşğul edən "əfv məsələsi"nin qabağına prezident Ərdoğan eni də hündürlüyü də xeyli qabaritli olan bir divar çəkdi.Həm də MHP-nin əfv təkidini "narkotika məhkumları" ilə eyniləşdirərək.

Təbii, məsələyə "narkotika" qarışınca, istər Bahçeli ilə Erdoğan istərsə də MHP ilə AKP arasəndakı mübahisənin "dozası" daha da yüksəldi. Yüksəliş təbii şəkildə bir çox sualı da özü ilə gətirib gəldi ki, Türk siyasəyinin yaxın gələcəkdəki aqibəti baxımından o sualların bəzilərinə nəzər salmaqda fayda vardır:

1)Son 2 ildə istisnasız olaraq bütün məsələlərdə prezident Erdoğana və AKP-yə sinəsini sipər edən MHP üçün qürur və hətta varlıq məsələsi halına gələn "ümumi əfv" məsələsində Erdoğan MHP-yə niyə "50 mindən çox narkotika məhkumunu" xatırladaraq cavab verməyi uyğun gördü?

2)Erdoğanın "50 mindən çox narkotika məhkumu" eyhamına MHP liderinin verdiyi "qeyri- dəqiq və etibarsız sözlər"- cavabı Bahçeli ilə Erdoğan arasındakı ittifaqın pozulmasına səbəb ola bilərmi?

90%-i Bahçeli ilə Erdoğan arasında, 10%-i isə MHP ilə AKP arasında olan ittifaqın bu günə qədərki macərasında Erdoğanın tez-tez təkrarlamağı xoşladığı "qazan-qazan" formulu yox,"Erdoğan və AKP qazansın"- formulu işləmişdi.MHP-nin bu 2 ildəki qazancı - seçki qanununda edilən dəyişiklik sayəsində Məclisdəki yerini qoruması olmuşdu.

"Narkotika ittihamı"na görə dozası yüksələn mübahisələrdən gördük ki,Erdoğan dövlət strukturlarının ən aşağı pillələrində belə MHP kadrlarına nəinki kreslo heç stul da verməyibmiş.Bu vəziyyət Azərbaycanlı bir qəzəl şairinin "Vəli səndən ox atmaq sinəmi etmək sipər məndən"- misrasını xatırlatsa da "50 min narkotika məhkumu" açıqlamasından gördük ki,Erdoğanın artıq MHP-yə ehtiyacı yoxdur.

2019-cu ilin martında keçiriləcək bələdiyyə seçkisində tamamilə əriyb getməsi bahasına da olsa,MHP-nin yenə AKP-ni dəstəkləyəcəyini açıqlamasına baxmayaraq, Erdoğan bələdiyyə seçkisində MHP-nin yenə və yenidən verməyi vəd etdiyi dəstəyin bu dəfə ziyana olacağını çox yaxşı gördü.

Türkiyə siyasətinin kodlarını hamıdan yaxşı bilən Recep Tayyip Erdoğana MHP dəstəyi buraya qədər lazım idi və görünür, cənab Erdoğan bunu çox sadə riyazi hesablama apararaq ortaya çıxardı: belə ki, Bahçelinin təkid etdiyi "ümumi əfv"dən 160 min nəfər istifadə edə biləcək.

Mart ayındakı bələdiyyə seçkisi ərəfəsində reallaşacaq "ümumi əfv"in AKP-yə faydadan çox zərər verəcəyini hesablayan AKP sədri və prezident Erdoğan, 2 illik ortağı MHP-ni bu qədər ağır şəkildə vurmağı buna görə uyğun gördü.24 iyundakı seçkidən sonra sistemi dəyişdirib parlamentdən məhkəmələrə qədər nəzarəti tamamilə əlinə alan cənab Erdoğanın MHP-yə ehtiyacı olsaydı, Türk siyasətinin son 16 ilinin ən "qurd" adamı 2 illik ortağını bu qədər ağır eyhama məruz qoyardımı? Erdoğanın bu ağır həmləsinə qarşı MHP lideri Bahçeli nə edəcək? Əslində "nə edə biləcək?"- deyə soruşmaq daha doğru olardı.

2002-ci ildən bəri Türk siyasəti iki dəfə MHP liderinin yaratdığı təlatümə şahid olub.Belə ki, ortağı olduğu koalisiya hökumətinin qərar qəbul etməməsinə baxmayaraq, 31 iyul 2002-ci özbaşına "erkən seçki" qərarı qəbul edən Devlet Bahçeli noyabrın 3-dəki seçkidə AKP-nin təkbaşına iqtidara gəlməsinə,koalisiyanın ortaqları olan DSP, MHP və ANAP-ın parlamentdən kənarda qalmasına səbəb olmuşdu.

7 iyun 2015-ci ildəki parlament seçkisində isə AKP-nin çoxluğu itirməsinə baxmayaraq, MHP koalisiya hökumətinə girmək istəməmiş və noyabrın 1-də lideri olduğu partiyanın böyük reytinq itirməsi bahasına AKP-nin yenidən təkbaşına iqtidarını davam etdirməsinə nail olmuşdu.

Prezident Erdoğanın "50 mindən artıq narkotika məhkumu" eyhamı Bahçelinin iqtidardan öz dəstəyini çəkməsinə səbəb ola bilərmi? Artıq bunun nə Erdoğan nə AKP nə də Türk siyasəti üçün fərqi var.Çünki iqtidardan dəstəyi çəkməsi cənab Erdoğanın və AKP-nin vecinə də olmayacağı kimi MHP-nin olan-qalan potensialını da silib-süpürəcək.

Lideri olduğu partiyanın və geniş kütlənin əriməsi Bahçelinin heç vaxt vecinə olmadı.Araşdırılması lazım olan siyasi fenomen elə budur.