Qırğızıstan prezidenti MDB dövlət başçılarının sammitinə məhəl qoymayıb

Qırğızıstan prezidenti Almazbəy Atambayev Minskdə MDB dövlət başçılarının sammitində iştirakdan imtina edib. Onun əvəzinə ölkəni baş nazirin birinci müavini Comərt Otorbayev təmsil edib.

Rəsmi Bişkek bununla bağlı açıqlama verməyib. Lakin Moskva ekspertləri şübhə etmirlər ki, buna səbəb Belarus prezidenti Aleksandr Lukaşenkonun Qırğızıstanın əvvəlki rəhbəri Kurmanbəy Bakiyevlə xüsusi münasibətlərinin olmasıdır. Qırğızıstanda dövlət çevrilişindən sonra Belarus hakimiyyəti Minskdə onu ailəlikcə qəbul edib. Bişkekin dəfələrlə müraciət etməsinə baxmayaraq, yeni hakimiyyətə təhvil verməyib. Bu barədə “Rossiyskaya qazeta” yazır.

Sammit ərəfəsində MDB ölkələri jurnalistləri üçün keçirilən mətbuat konfransında Lukaşenko özünə xas manera ilə Qırğızıstanın yeni hakimiyyətinə “əməkdaşlıq səhifəsini çevirməyi”  necə təklif etdiyindən danışıb. “Mujiki, prekratite o Bakieve qovorit” deyə rəsmi Bişkekə müraciət edib. 

Bakiyevdən başqa digər bir səbəb də açıqlanır. Bu, RF prezidentinin sammitdə iştirak etməsidir. Ötən gün Qırğızıstan XİN Moskvada qırğız miqrantların saxlanması və deportasiyası ilə bağlı bəyanatla çıxış edib. Bişkekdə “Rusiya miqrasiya xidmətləri tərəfindən onlara qarşı qərəzli münasibət” ilə bağlı 

narazılıq var.

Qırğızıstan hakimiyyəti Gömrük İttifaqına daxil olmaq niyyətini bəyan edən ölkənin vətəndaşlarına qarşı bu cür münasibəti gözləmirdi. Halbuki, başqa ölkələr (Ukrayna və Moldova) buna sövq edilir. Odur ki, Qırğızıstan liderinin MDB inteqrasiya sammitinə gəlməməsinə daha tutarlı səbəb var, nəinki gözdən düşmüş eks-prezident Kurmanbəy Bakiyevin Belarusda yaşaması. Atambayevin Minskə hətta baş naziri yox, onun müavinini göndərməsi isə Bişkekin Moskva ilə münasibətlərinin soyuqlaşdığını nümayiş etdirir və Gömrük İttifaqından geri çəkilməyə səbəb ola bilər.

Cümə axşamı Minskdə Avrasiya Ali İqtisadi Şurasının  dövlət başçıları səviyyəsində (Qırğızıstan prezidentinin iştirakı olmadan)iclası keçirilib. .--0--