AÇG-də bir quyunun orta məhsuldarlığı sutkada 1000 tondur

«Hazırrda Azəri-Çıraq-Günəşli blokunda 86 quyudan sutkada 86 min ton (630 min barrel – red) neft çıxarılır”, –  deyə SOCAR-ın geologiya, geofizika və yataqların işlənməsi üzrə birinci vitse-prezidenti Xoşbəxt Yusifzadə çərşənbə günü Xəzər-Avropa Klubunun biznes forumunda bildirib.

Onun  sözlərinə görə, bu ilin 9 ayında AÇG yatağında 23,5 mln ton neft hasil edilib. Bunun 15,5 mln tonu Azərbaycanın mənfəət neftidir.

Yusifzadə əlavə edib ki, 1997-ci ilin noyabrından bu blokdan 381 mln ton neft çıxarılıb. Bunun 208 mln tonu Azərbaycanın mənfəət neftidir.

O deyib ki, AÇG-nin geoloji ehtiyatları 2,2 mlrd ton neft, çıxarıla bilən ehtiyatlar 1 mlrd tondur. “İndiyədək geoloji ehtiyatların 17%-i çıxarılıb. 2024-cü ilin sonuna kimi 623 mln ton neft və ya geoloji ehtiyatların 28%-i çıxarılacaq. 10-15 ildən sonra hasilat texnologiyaları daha da təkmilləşəcək və çıxarıla bilən ehtiyatlar artacaq”, - deyə Yusifzadə əlavə edib.

2015-ci ilin sonuna qədər BP və digər tərəfdaşlarla AÇG blokunun işlənməsinə dair qüvvədə olan müqavilə üzrə yeni müvafiq müqavilə imzalanacaq”, - deyə o qeyd edib.

Turan xatırladır ki, 2014-cü ildə AÇG-dən 233 mln barrel neft çıxarılıb. Bu, 2013-cü ildəkindən 6 mln barrel azdır. I yarımildə bu göstərici 116 mln barrel olub. Bu, ötən ilin eyni dövründəkindən 2,8 mln barrel azdır. Bu ay BP-Azerbaijan “Çıraq” yatağını 3 həftəlik təmirə dayandıracaq. Bu platformada sutkada 50 min barrel neft çıxarılır.

* AÇG yatağının işlənməsi haqqında müqavilə 1994-cü il sentyabrın 20-də imzalanıb və elə həmin ilin dekabrın 12-də qüvvəyə minib.

Hazırda layihənin iştirakçıları BP (Böyük Britaniya - 35,78%), Amerikanın “Chevron” (11,27%), “ExxonMobil” (8,0006%), Hindistanin “ONGC Videsh Limited” (2,72%), Yaponiyanın “Inрex Corр.” (10,96%) və “Itochu Oil” (4,3%), Azərbaycanın SOCAR (11,65%), Norveçin “Statoil” (8,56%) və Türkiyənin TPAO (6,75%) şirkətlərdir.–12С--