AÇG-nin dövlətə gətirdiyi mənfəət 2016-da 25,6% azalıb

AÇG-dən Neft Fonduna gələn mənfəət 2016-cı ildə 1 milyard 758 milyon ABŞ dolları aşağı düşüb. Bu qənaətə bu gün Azərbaycan Dövlət Neft Fondunun ictimaiyyət üçün “Azəri-Çıraq-Günəşli” (AÇG) yataqlarından gələn gəlirləri açıqlamasından gəlmək olar.

Belə ki, Fondun məlumatında bildirilir ki, 2016-cı il ərzində AÇG yataqlarından dövlətin əldə etdiyi mənfəət neftinin dəyəri isə 5 milyard 100 mln. ABŞ dolları olub.

Turaqn agentliyi isə xatırladır ki, 2015-ci ildə AÇG-dən Neft Fonduna daxilolmaların ümumi məbləği 6 milyard 858 milyon ABŞ dolları olmuşdu. Ötən il AÇG-dən dövlətin payına düşən mənfəət 25,6% azalıb. Bəs gəlirlərin kifayət qədər azalmasına hansı amillər təsir edib?

Qeyd edək ki, 2015-ci ildə Azərbaycan neftinin orta ixrac qiyməti 1 barel üçün 54,30 təşkil etmişdisə, 2016-cı ildə bu göstərici 45,05-ə qədər azalmış, bundan əlavə 2015-ci ildə AÇG müqavilə sahəsində gündəlik orta hasilat 634 min barel təşkil etmişdisə, ötən il hasilatın təqribən 0,7% azalması qeydə alınıb.

Neft Fondunun məlumatına görə, AÇG üzrə əldə olunan ümumi gəlirlər 2001-ci ildən etibarən 1 yanvar 2017-ci il tarixinə 122 milyard 109 mln. ABŞ dolları təşkil edib. AÇG-nin gəlirləri Neft Fondunun ümumi daxilolmalarının 90%-dən artığını təşkil edir. –12B--