Amerikanin hess şirkəti azərbaycandan gedir

Amerikanın Hess şirkəti Azərbaycan aktivlərindən tamamilə yaxa qurtarıb. 2012-ci ilin sentyabrın 7-də o Xəzərin Azərbaycan sektorundakı «Azəri-Çıraq-Günəşli» (AÇG) neft hasilatı layihəsində özünün 2,72% payını, həmçinin Bakı-Tbilisi-Ceyhan (BTC) boru kəmərində 2,36% payını Hindistanın ONGC şirkətinə satdığını bəyan edib. 

Şirkətin saytında yerləşdirilən məlumata əsasən, sövdələşmə $1 mlrd dəyərində qiymətləndirilir. Alış-veriş sövdələşməsini 2013-cü ilin I rübündə yekunlaşdırmaq planlaşdırılır.

«AÇG-də payımızın satışı kiçik faiz aktivlərin ləğv edilməsi strategiyamıza uyğun gəlir», deyə Hess şirkətinin kəşfiyyat və hasilat şöbəsinin prezidenti Qreq Hill bildirib. 

Xəzər dənizində, Bakıdan təxminən 100 km şərqdə yerləşən «Azəri-Çıraq-Günəşli» neft yatağı BP-nin operatorluğu ilə 1997-ci ildə işlənilməyə başlayıb. O vaxtdan müqavilə blokundan 280 mln ton neft hasil edilib. 

* Hazırda AÇG səhmdarları bunlardır: BP - 35,83%,

Chevron - 11,27%, Inpex - 10,96%, SOCAR - 11,61%, Statoil - 8,56%, Exxon - 8%, TRAO - 6,75%, Itocu - 4,3% və Hess - 2,72%.

BTC Co-nun səhmdarları bunlardı: BP (30,1%), SOCAR (25%), Chevron (8,9%), Statoil (8,71%), TRAO (6,53%), Eni (5%), Total (5%), Itochu (3,4%), 

Inpex (2,5%), ConocoPhillips (2,5%) və Hess (2,36%). --12D--