Antidempinq qanunu qüvvəyə minib

«Antidempinq, kompensasiya və mühafizə tədbirləri haqqında" yeni qanun qüvvəyə minib. İqtisadiyyat Nazirliyinin məlumatına görə, qanunun qəbulunda məqsəd  yerli istehsalçıların subsidiyalşdırılmış ixracdan və dempinqdən (ölkəyə qiymətindən ucuz mal gətirilməsi) qorunmasıdır.

İyulun 13-də Azərbaycan prezidenti müvafiq fərman imzalamışdı. Qanun dempinqi müəyyən edən müxtəlif tədbirləri, o cümlədən ölkəyə gətirilən mallara gömrük rüsumunun artırılmasını nəzərdə tutur.

Qanuna əsasən, ixracatçı ölkənin daxili bazarında istehlak üçün nəzərdə tutulmuş oxşar malın satış həcmi həmin malın gömrük ərazisinə idxal həcminin 5%-dən az olmadıqda normal dəyərin müəyyən edilməsi üçün kifayət edəcək miqdar hesab olunur. 

Dempinq və subsidiyalşdırılmış idxalın yerli istehsala təsiri idxal həcminin analizi, onun yerli məhsulun qiymətinə təsiri, idxal və yerli malın qiymət fərqi, dempinq marjası və s ilə müəyyən ediləcək.

Antidempinq tədbirləri ciddi araşdırmalardan və yoxalmadan 60 gün sonra tətbiq edilə bilər. Müvəqqəti rüsumun məbləği dempinq marjası və subsidiya həcmindən çox ola bilməz. Antidempinq tədbirlərinin müddəti 4-9 ay olacaq. Antidempinq və kompensasiya tədbirləri 5 ildən çox müddətə tətbiq eidlə bilməz.

Qanun layihəsi hazırlananda ÜTT-nin dörd direktivindən istifadə edilib. --17D—