Antiinhisar Siyasəti Xidməti yumurtanın qiyməti ilə bağlı çıxış edib

İqtisadiyyat Nazirliyi yanında Antiinhisar Siyasəti və İstehlakçıların Hüquqlarının Müdafiəsi Dövlət Xidməti istehlak bazarında yumurtanın satış qiyməti ilə bağlı analizinin nəticələrini açıqlayıb

  Bu, Xidmətin istehlak bazarında qiymətlərin vəziyyəti barədə bir neçə aydan sonra ilk məlumatı idi.
Məlumatda deyilir ki, yumurtanın satış qiyməti bu ilin 1 yanvarına nisbətən 25%-dək ucuzlaşıb və hazırda 12-15 qəpik arasında dəyişir.

Maraqlıdır ki, bir çox ərzaq mallarının qiyməti durmadan artır. Amma ASİHMDX son 12 ayda bu barədə, o cümlədən siqaretin süni bahalanması barədə çıxış etməyib.

Bir neçə il əvvəl prezident İlham Əliyev yumurtanın qiyməti ilə bağlı Antiinhisar Siyasəti Xidmətini sərt tənqid edib və quşçuluq təsərrüfatlarının rəhbərlərini cinayət məsuliyyəti ilə hədələyib. Bir neçə şəxs cinayət məsuliyyətinə cəlb edilib. O vaxtda yumurta İqtisadiyyat Nazirliyinin tədqiqat obyektinə çevrilib.

Respublika Quşçuluq Cəmiyyətinin rəhbəri Aydın Vəliyev Turan-a bildirib ki, yumurtanın ucuzlaşması bazarda çox olması ilə bağlıdır. Hazırda məhsulun ixracı gündəmə gəlib.

2016-cı ildə 1,6 mlrd yumurta istehsal edilib. Bu, 2015-ci ildəkindən 3,7% çoxdur. Orta hesabla ayda 133 mln yumurta istehsal edilir. Məlumat olmadığı üçün yanvar-fevralda istehsalın nə qədər artdığını demək olmur. --08D—