Azərbaycanın gənc alimləri Intel International Science and Engineering Fair 2014 müsabiqəsinin finalında

  2014-cü il mayın 11-dən 16-a kimi Los-Anceles şəhərində  (Kaliforniya, ABŞ) keçiriləcək Intel® International Science and Engineering Fair 2014 beynəlxalq müsabiqəsinin finalı keçiriləcək. Artıq bu mərhələnin Azərbaycan üzrə finalçıları müəyyən edilib. Bunlar  16 nömrəli texniki-humanitar liseyin 10 və 11-ci sinif şagirdləri Cəmil İmranov və Nərgiz Allahverdiyeva (“Dəmir oksidlərinin nardakı nanohissəciklərinin sintezi və səciyyəsi” layihəsi), Mədinə Mürsaqulova, Lalə Cümşüdlü və Cəmil Muradov (“Enerjinin kriogen üsulla qorunması” layihəsinin müəllifləri), gənc istedadlar liseyini təmsil edən Ayaz Əbuzərovdur (“Qlükoza-fosfatın sintezində yeni üsul və ATF birləşmələrinin səmərəliliyinin artırılması üçün onlardan istifadə” layihəsi). 

“Intel ISEF” müsabiqəsinin milli seçim mərhələsi olan “Gələcəyin alimləri” müsabiqəsi cari il fevral ayının 13-dən 15-dək Bakı, Sumqayıt və Naxçıvan şəhərlərində orta ümumtəhsil məktəblərinin 9-11 sinif şagirdləri arasında keçirilib. Səkkiz kateqoriya üzrə 108 şagird (riyaziyyat, fizika, kimya, biologiya, tibb və səhiyyə, ekologiya, maşınqayırma, kompyuter elmləri) 65 tədqiqat layihəsini təqdim edib. «Madad Azerbaijan», BDU, «Qafqaz» Universiteti onlara fəal kömək edib.

MDB ölkələrində Intel təhsil proqramlarının direktoru Tatyana Nanayevanın sözlərinə görə, məktəblilərin istedadının açılmasına kömək edilməlidir. «İnanırıq ki, birgə səylərimizlə sinergetik effekt yaradacağıq. Bu, elmi-texniki tərəqqini sürətləndirir», - deyə o bildirib.

Azərbaycan bu müsabiqəyə 2011-ci ildə qoşulub. Müsabiqə haqda bu saytda məlumat öyrənmək olar www.sabahinalimleri.edu.az.

Intel International Science and Engineering Fair beynəlxalq müsabiqəsi hər il ABŞ-da “Intel” korporasiyasının təşəbbüsü ilə keçirilir. “Intel ISEF” artıq 60 ildir ki, mövcuddur. İndiyədək 20-dən çox Nobel laureatının karyerasına start verib. Müsabiəqinin mükafat fondu $3 mln-dır. Ətraflı məlumatları http://www.intel.com/education/isef internet saytından əldə etmək olar. --17D—