Art for Democracy: Azərbaycanda yaradıcılıq azadlıqlarının təminatı sahəsində ciddi problemlər var

Bu gün Central Park otelinin administrasiyası ART for Democracy (“Demokratiya naminə incəsənət”) hüquq-müdafiə kampaniyasının öz saytının və “Azərbaycanda artistik ifadə azadlığı: yaradıcılıq təzyiq altında” adlı hesabatının təqdimatını keçirməsindən imtina edib. Təşkilatçılar müqavilə bağlasalar da, tədbir başlamazdan yarım saat əvvəl icarə haqqını ödəsələr də mehmanxananın administratoru kampaniyanın koordinatoru Rəsul Cəfərova telefon edərək bildirib ki, “texniki səbəblər”dən tədbir ləğv olunur.

Sonra administrator təşkilatlaçıları gördükdə deyib ki,  FHN nümayəndələri bildirib  ki, elektrik enerjisi və qaz təchizatı sistemində hansısa problemlər var.

Ruslan adlı şəxs mətbuata şərh verməkdən imtina edərək bildirib ki, tədbir “texniki səbəblər”dən təxirə salınıb.

R.Cəfərov hesab edir ki, tədbir siyasi motivlərlə pozulub. O, bunu toplaşma və ifadə azadlığının pozulması kimi qiymətləndirib.

O xatırladıb ki, iki həftə əvvəl Grand Hotel də son məqamda konfrans zalını ayırmaqdan imtina etmişdi.

R.Cəfərov deyib ki, hər iki mehmanxana ilə bağlı məhkəmədə iddia qaldırılacaq.

Onun fikrincə, indiki halda söhbət yalnız şəxsi hüquqların pozulmasından getmir, həm də Avropa İnsan Hüquqları Konvensiyasının 10-cu maddəsində nəzərdə tutulan demokratik ifadə azadlığının pozulmasından gedir. “Odur ki, biz bu işi Avropa İnsan Hüquqları Məhkəməsinə çıxarmaq niyyətindəyik”, - R.Cəfərov vurğulayıb.

O həmçinin bildirib ki, təqdimatı keçiriləcək

http://www.artdemocracy.net saytı kütləvi hücumlara məruz qalıb və dağıdılıb. Hazırda saytın bərpası üçün tədbirlər həyata keçirilir.

Tədbirin pozulması ilə əlaqədar təşkilatçılar sözügedən hesabatı yayıblar. Araşdırmada 2011-ci ildən yaradıcılıq azadlığının reallaşması ilə bağlı vəziyyət əksini tapır.

Qeyd olunur ki, hakimiyyətin yaradıcılıq azadlığını təmin etməklə bağlı öhdəliklərinə baxmayaraq, onlar birbaşa və ya dolayısı ilə pozulur. Tənqidi fikirli incəsənət xadimləri dövləti dəstəkləyən həmkarları ilə qeyri-bərabər şəraitə düşürülür.

Hesabatda incəsənət və mədəniyyət xadimlərinə təzyiqlərlə bağlı konkret faktlar göstərilir.

Rok ifaçısı Azər Cırtdan konsertləri qadağan olunandan və özü də naməlum şəxslər tərəfindən təqiblərə məruz qalandan sonra ölkədən gedib.

Müğənni, iranlı dissident Araz Elsəs də ölkəni tərk edib. Belə ki, Tehran hakimiyyətinin təzyiqi altında onun konsertləri qadağan edilib.

Reper Camal Əli 10 sutka inzibati həbsdə qaldıqdan sonra ölkəni tərk edib. Həbsdə olduğu müddətdə işğəncələrə məruz qalıb. O, prezident İlham Əliyevin ünvanına xoşagəlməz fikirlər söylədikdən sonra həbs olunub.

Keçmiş deputat, bəstəkar, vətəndaş fəallığına çağıran “Susma” klipinin müəllifi Hüseyn Abdullayev ölkəni tərk edib.

Hesabatda Kinematoqrafçılar İttifaqına qarşı cinayət işinin qaldırılması, onun rəhbəri Rüstəm  İbrahimbəyova və mühasib Lalə Əfəndiyevaya qarşı həbs hədələrinin olması da yer alıb.

Aktyor İlqar Cahangir Gənc Tamaşaçılar Teatrından çıxarılıb. Çünki o, teatra dövlət qayğısının olmamasından, teatrlarda hər yerdə prezident İlham Əliyevin portretlərinin asılmasından danışıb.

“Tenqri” rok qrupunün üzünə bütün konsert zalları bağlıdır. Çünki qrup siyasi mövzularda mahnılar ifa edir. Bunların arasında “Monitor” jurnalının baş redaktoru, 2005-ci ilin martında qətlə yetirilmiş Elmar Hüseynova həsr olunan mahnılar da var.

Bloger İlkin Rüstəmzadə və Bəxtiyar Quliyev Harlem Shake fleş-mobun ifasına görə xuliqanlıqda ittiham olunaraq həbs ediliblər (hər iki gənc NİDA fəallarının işi üzrə mühakimə olunub).

Hüquq-müdafiə kampaniyasının fəalları da təzyiqlərə məruz qalıblar. Kampaniyanın ictimai vəkillik üzrə direktoru Rebekka Vinsentin Azərbaycana gəlişinə qadağa qoyulub.

Hesabatın sonunda Rüstəmzadə və Quliyevin azadlığa buraxılması, reper C. Əliyə qarşı işgəncələrin araşdırılması, H.Abdullayevə, R.İbrahimbəyova, L.Əfəndiyevə qarşı cinayət təqibinə son qoyulması, mühacirət etmiş incəsənət xadmlərinin təhlükəsiz qayıdışına şərait yaradılması, yaradıcılıq azadlığı sahəsində beynəlxalq öhdəliklərə əməl olunması tövsiyə edilir.

  Art for Democracy hüquq-müdafiə kampaniyası 2012-ci ilin dekabrında bir qrup hüquq müdafiəçisi və incəsənət xadimi tərəfindən yaradılıb. Məqsəd incəsənətin müxtəlif formalarının vasitəsilə demokratiya və insan hüquqları ideyalarını təbliğ etməkdir. Kampaniyanın fərdi əsaslarla koordinatoru hüquq müdafiəçisi Rəsul Cəfərovdur.—06D--