Bryuno le Mer: Ərzaq təminatı həm də insan hüquqları məsələsidir

Bakıda rəsmi səfərdə olan Fransanın kənd təsərrüfatı naziri Bryuno Le Mer bu gün ADA Universitetində birinci kurs tələbələri qarşısında “Qlobal perspektivlər: 2050-ci ilə qədər bəşəriyyətin ərzaq təminatı” adlı məruzə ilə çıxış edib.

“Arzu edirəm ki, siz, gələcək siyasətçilər, diplomatlar, dövlət qulluqçuları xalqınızın tarixini və mədəniyyətini dünya ictimaiyyətinə çatdırmağa öz töhfənizi verəsiniz. 20-ci əsrin əvvəllərində Fransa solisti Jan Joresin çağırış etdiyi kimi, cəsur olun”, deyə 25 il əvvəl Paris Siyasi Elmlər İnstitutundan məzun olan Le Mer tələbələrə müraciət edib. Bu gün Fransa siyasətinin prioritetləri gənclər və təhsildir və düzgün təhsil sabit inkişafın açarıdır, deyə o əlavə edib.

Le Mer qeyd edib ki, beynəlxalq iqtisadi böhran təkcə maneə deyil, həm də “tarazlaşdırılmış dünya” yaradılması yolunda imkandır. “Maliyyə və istehsal, kənd təsərrüfatı və ətraf mühit arasında balans olmalıdır. Bu təmayül qarşılıqlı səmərəli iqtisadi əməkdaşlıq üçün də imkanlar yaradır. Bu mənada Fransa təkcə öz ərzaq potensialının deyil, həm də öz tərəfdaşlarının artırılmasında maraqlıdır. Belə ki, ərzağa artmaqda olan tələbatın təmin edilməsi üçün yeni mənbələr lazımdır”, deyə fransalı nazir bildirib.

Fransa qarşısında yeni çağırışlar böyük istehsalat və böyük ixracatdır. Bu gün Fransanın aqrosənaye kompleksi sahəsində 500 min nəfər işləyir, illik ərzaq ixracatı isə 150 mlrd. avroya çatır. Amma bu, kifayət etmir. Hər gün dünyanın 1 mlrd.-a yaxın əhalisi ac qalır. 2050-ci ilə qədər dünya əhalisi 7 mlrd. nəfərdən 9 mlrd. nəfərə qədər artacaq, onları doyurmaq çətin olacaq. Dünya ərzaq istehsalatının 30%-i itki və ya israfa getdiyi bir şəraitdə bu, daha da çətin olacaq. “İnsanların layiqli və keyfiyyətli qida ilə təmin edilməsi insan hüquqları məsələsidir. Bundan başqa, bu, Yer üzərində siyasi sabitlik, sülh amilidir. Eyni zamanda, bu, həm də iqtisadi sabitlik deməkdir. Bunların hamısına isə ədalət və həmrəyliklə nail olmaq olar”, deyə Fransanın kənd təsərrüfatı naziri Bryuno Le Mer çıxışını yekunlaşdırıb.

ADA Universitetinin prorektoru Fariz İsmayılzadə nüfuzlu qonağa tələbələrin “heç vaxt unutmayacağı” çıxış üçün təşəkkür edib. Görüşdə bir neçə ölkənin Bakıda akkreditə olunmuş diplomatik korpusunun nümayəndələri də iştirak ediblər.

“Qlobal perspektivlər” mövzusunda görüşlər ADA Universitetində ənənəvi olaraq keçirilir və indiyədək müxtəlif ölkələrin görkəmli dövlət və hökumət liderləri onun qonaqları olub. -08C-