�Buta Airways� işə düşdü, AZALJET dayandı

Bakı/11.07.17/Turan: Bu gün, iyulun 11-dən etibarən "Buta Airways" aşağı büdcəli aviaşirkətinin aviabiletləri satışa buraxılıb.

Aviaşirkətin saytı "Buta Airways"ın Azərbaycanda ilk aşağıbüdcəli aviaşirkəti olduğunu, "Azərbaycan Hava Yolları" QSC-nin struktur bölməsi olduğunu bildirir.

Aviaşirkətin ilk uçuşu sentyabrın 1-nə, Tbilisi şəhərinə planlaşdırılıb.

Aviaşirkət Bakıdan Moskvaya, Kiyevə, Antalya, Kazan, Mineralnıye Vodı, Tbilisi və Tehrana uçuşlar yerinə yetirəcək.

Qış mövsümünün başlanması ilə "Buta Airways"in marşrut şəbəkəsinə İstanbul və Sankt-Peterburq kimi şəhərlər də əlavə olunacaq.

"Buta Airways" parkına Embraer E190 və E170 təyyarələri daxildir.

Bütün istiqamətlər üzrə minimal tarif bir tərəfə 29 avro təşkil edir.

"Buta Airways"ın fəaliyyətə başlaması ilə aşağı büdcəli "AZALJET"in fəaliyyəti dayandırılıb. Artıq "AZALJET" brendi üzrə bilet satışı dayandırılıb.

Bu haqda isə Report-a AZAL-ın mətbuat xidmətindən bildiriblər.

Mətbuat xidmətindən əlavə edilib ki, bundan sonra Azərbaycanda dövlətə məxsus 2 mülki aviasiya brendi - "AZAL" və "Buta Airways" fəaliyyət göstərəcək.

Ancaq AZAL əvvəllər aviaşirkətlərin paralel fəaliyyət göstərəcəyini açıqlamışdı. "AZAL"ın mətbuat xidmətindən 2016-cı ilin dekabrında AzadlıqRadiosu-na bildirmişdilər ki, "BUTA" turizmlə bağlı Yol Xəritəsi çərçivəsində yaradılacaq.

"AzalJet" aşağı büdcəli brenddir. "Buta Airways"sə öz işçi ştatı, təyyarə parkı və tarif siyasəti olan ayrıca aviaşirkət olacaq. Bənzər təcrübələri bir çox aviaşirkətlərdə müşahidə etmək olar. Məsələn, "AnadoluJet" "Turkish Airlines"ın törəmə müəssisəsidir, "FlyDubai" və "Emirates" aviaşirkətlərinin ümumi təsisçisi var. Rusiyanın "Pobeda" azbüdcəli şirkəti isə "Aeroflot"un tam törəmə müəssisəsidir", mətbuat xidməti bildirmişdi.

"AZALJET"lə "Buta Airways"ın tarixçəsi

"AZALJET"in yaradılmasına 2016-cı ilin əvvəlində başlanmışdı. Həmin ilin fevralında AZAL prezidenti Cahangir Əsgərov şirkətin aşağı büdcəli istiqamətlər üzrə uçuşları yerinə yetirəcək yeni AZALJET brendinin yaradılmasına dair planlarını elan etmişdi.

"Bu biznes-model müəyyən xidmətlərə qənaət edilməsini nəzərdə tutur. Bu da, klassik aviaşirkətlər ilə müqayisədə qiyməti xeyli aşağı salmağa imkan verir. Bununla yanaşı, biz Azərbaycanın milli aviadaşıyıcısının bütün reyslərində əvvəlki kimi təhlükəsizliyə və xidmətin yüksək səviyyəsinə zəmanət veririk", Cahangir Əsgərov həmin vaxt söyləmişdi.

AZALJET brendi altında uçuşlara həmin il martın 28-dən etibarən Azərbaycan mülki aviasiyasının mövcud infrastrukturu əsasında yerinə yetirilməyə başlanmışdı.

2016-cı ilin dekabrında hökumət "Azərbaycanda ixtisaslaşmış turizm sənayesinin inkişafına dair Strateji Yol Xəritəsi"ni açıqlamışdı. Həmin xəritədə yeni aşağı büdcəli aviaşirkətin - "Buta Airways"ın yaradılması nəzərdə tutulurdu.