Dəmiryol şirkəti Bakı-Balakən hərəkət marşrutunun açılma tarixi barədə məlumat verməkdən imtina edib

Bakı/04.09.23/Turan: Kovid epidemiyasından əvvəl fəaliyyət göstərən Bakı-Balakən-Bakı sərnişin dəmiryol xətti 19 mart 2020-ci il tarixindən etibarən fəaliyyət göstərmir.

Həmin gündən Abşeron yarımadasında elektrik qatarları istisna olmaqla, bütün dəmiryol marşrutlarında nəqliyyatın hərəkəti dayandırılıb.

Sonra köhnə sərnişin qatarlarının yataq yerləri olmayan yeni sürətli vaqonlarla əvəzlənməsi ilə hərəkət tədricən bərpa olundu. Bakı-Balakən marşrutu isə bərpa olunmayıb.

"Azərbaycan Dəmir Yolları" QSC-dən "Turan"ın sorğusuna cavab olaraq bildiriblər ki, Bakı-Balakən dəmiryol xəttində infrastruktur və yol işləri aparılır. Relslər dəyişdirilir. Bu işlər başa çatdıqdan sonra bu marşrut üzrə nəqliyyatın hərəkəti bərpa olunacaq.

Hərəkətin bərpasının təxmini tarixi ilə bağlı suala QSC-dən cavab vermədilər və bildirdilər ki, nəqliyyatın hərəkətinin açılma vaxtı ilə bağlı mətbuata məlumat veriləcək.

Göstərilən dəmiryol xəttinin yaxınlığında avtomobillə hərəkət edən "Turan"ın müxbiri Qax və Şəki rayonlarında dəmiryol zolağında iş aparıldığını görməyib. Qətiyyətlə demək olar ki, bu il Bakı-Balakən-Bakı marşrutu üzrə qatarların hərəkəti olmayacaq.

Bu marşrut üzrə dəmiryol əlaqəsinin olmaması səbəbindən on minlərlə sərnişin özəl mikroavtobuslarda və sərnişin taksilərində getməyə məcbur olur.

Dağ yollarında avtomobillərin hərəkətinin çoxalması insan tələfatı ilə nəticələnən avtomobil qəzalarının artmasına səbəb olub.

2022-ci ilin oktyabrında Qobustan rayonunda “Mercedes-Vito” markalı mikroavtobus yük maşınına çırpılıb, qəza nəticəsində iki nəfər ölüb, bir nəfər ağır yaralanıb.

2022-ci ilin sentyabrında həmin mikroavtobus Zaqatalada qəzaya uğrayıb, 3 nəfər xəsarət alıb.

Azərbaycanda hər il yol qəzalarının sayında 2-7% artım qeydə alınır. Dövlət Statistika Komitəsinin məlumatına görə, 2022-ci ildə 1668 yol qəzası qeydə alınıb, bu qəzalarda 834 nəfər ölüb. —0—