Əmək və Əhalinin Sosial Müdafiəsi Nazirliyində dövlət vəsaitlərindən istifadə zamanı pozuntular olub

Hesablama Palatası iyulun 26-da Əmək və Əhalinin Sosial Müdafiəsi Nazirliyində və onun 5 strukturunda 2014-cü ildə və 2015-ci ilin 9 ayında dövlət büdcəsi vəsaitlərindən istifadə üzrə audit yoxlamasının nəricələri haqqında hesabatı açıqlayıb.

Bu dövrdə Nazirlik və onun seçmə üsulla müəyyən edilmiş 5 qurumu 433,8 mln manat məbləğində vəsaitdən istifadə edib. Əhatə olunmuş vəsaitlərin 86,4%-i məhz funksional fəaliyyət üzrədir.

HP-nin saytında yerləşdirilən hesabatda qeyd edilir ki, mərkəzi aparatın saxlanılması xərclərinin icrası zamanı staja və hakimiyyət səlahiyyətlərinin icrasına görə əlavələrin hesablanılmasında nöqsanlara yol verilib, dövlət qulluqçusu olmayan işçilərə məzuniyyətə çıxdıqları zaman düzgün olmayaraq müavinət və mükafat ayrılıb.

Nazirlik tərəfindən maliyyələşdirilən sosial layihələrin hazırlanması və həyata keçirilməsi, dövlət satınalmaları zamanı rəqabət mühitinin formalaşdırılmasında nöqsanlara yol verilib.  Xərclər smetalarının tərtibi zamanı qanunvericiliklə müəyyən edilmiş normalar əsas götürülməyib, kommunal xərclər üzrə vəsaitin məbləği real sərfiyyata uyğun proqnozlaşdırılmayıb.

Əmək və Əhalinin Sosial Müdafiəsi Nazirliyində inventar alışı həcmi, idman yarışları üçün xərclər də normativdən artıqdır. Müsabiqələrdə müxtəlif qiymətlərlə müqavilələr bağlanılması səbəbindən səmərəsiz xərclərə yol verilib.

İnvestisiya layihələri üzrə işlər daha pisdir. Tikinti layihələrinin əsaslandırılması, ilkin strukturu və qiymətləndirilməsini əks etdirən ilkin texniki-iqtisadi əsaslandırma sənədləri hazırlanmayıb, yaşayış məntəqələrinin ərazi planlaşdırılması çərçivəsində müfəssəl planların hazırlanması və dövlət ekspertizasından keçirilməsi təmin edilməyib.

Hesablama Palatası dövlət büdcəsindən yayındırılan vəsaitin həcmi və onların bərpası haqda məlumat vermir. --08D—