Hasilat şirkətləri 2012-ci ildə $3 mlrd-dan çox vergi ödəyib

 Azərbaycan hökuməti 2012-ci ildə vergi və başqa mədaxil qismində hasilatla məşğul olan yerli və xarici şirkətlərdən $454,356 mln və 2 mlrd 109,208 mln manat ($2,69 mlrd - red.) əldə edib. ARDNF-nin saytındakı Mineral Ehtiyatların Hasilatı ilə Məşğul olan Sənaye Sahələrində Şəffaflıq Təşəbbüsünün (MHŞT) 17-ci hesabatında bu barədə bildirilir.

Hesabata əsasən, hasilatla məşğul olan yerli və xarici şirkətlər 2012-ci ildə dövlətə pay kimi 160,755 mln barrel neft, 3 mlrd 519 mln 626,929 min m3 qaz, 6,56 min unsiya qızıl və 6,369 min unsiya gümüş veriblər.

Azərbaycanın mənfəət neftinin payı $73,025 mln, mənfəət qazının payı $365,458 mln, bonuslar $2 mln, akr hesablı ödənişlər $13,873 mln təşkil edib.

Şirkətlər vergi kimi dövlətə 1 mlrd 763,38 mln manat ödəyiblər. Bunun 1 mlrd 528,153 mln manat mənfəət vergisi, 122,770 mln manat yeraltı sərvətlər üzrə vergi daxilolmaları, 75,299 mln manat ƏDV, 10,9 mln manat torpaq vergisi, 24,967 mln manat əmlak vergisi, 1,291 mln manat başqa vergilərdir.

Qiymət fərqindən mədaxil 345,828 mln manat olub.

Azərbaycan hökuməti və şirkətlərin hesabatını Moore Stephens auditor şirkəti təsdiq edib.

Hesabatın hazırlanması 24 noyabr 2004-cü ildə EITI-nin həyata keçirilməsi üzrə hökumət komissiyası, xarici və yerli şirkətlər və QHT koalisiyası arasında imzalanan memorandum əsasında həyata keçirilir.

Memoranduma əsasən, hasilatla məşğul olan şirkətlər ildə bir dəfə öz köçürmələri barədə hökumətə məlumat verməli, hökumət isə şirkətlərdən mədaxil barədə hesabat hazırlamalıdır. Bütün məlumatlar auditor şirkətinə təqdim edilir. Şirkət bunun əsasında hökumətin gəlirləri üzrə ümumi hesabat hazırlayır.

EITI hesabatı bir dəfə ilin yekunu üzrə hazırlanır.

* Azərbaycan MHŞT prosesinə 2003-cü ildə qoşulub. 2003-cü ilin noyabrında Nazirlər Kabinetinin sərəncamı ilə EIT üzrə komissiya yaradılıb.--12D--