MONEYVAL Komitəsi Azərbaycanın pulların yuyulması ilə mübarizə üzrə fəaliyyətindən razıdır

Bakı/03.10.17/Turan: Ötən həftə Fransanın Strasburq şəhərində Avropa Şurasının Pulların yuyulmasına və terrorçuluğun maliyyələşdirilməsinə qarşı tədbirlərin qiymətləndirilməsi üzrə Ekspertlər Komitəsinin (MONEYVAL) plenar iclasında Azərbaycanın pulların yuyulması və terrorçuluğun maliyyələşdirilməsinə qarşı mübarizə üzrə növbəti tərəqqi hesabatı müzakirə edilib. Maliyyə Bazarlarına Nəzarət Palatasının məlumatına görə, Komitə Azərbaycan hökumətinin hesabatını təsdiq edib.

Beynəlxalq araşdırmaçı jurnalistlər şəbəkəsi bu ilin sentyabrında Azərbaycan Beynəlxalq Bankı və Estoniyanın Danske Bankının filialının iştirakı ilə 2012-2014-cü illərdə 2,9 mlrd ABŞ dollarının yuyulmasını aşkarlayıb. Bu məbləğ şübhəli məqsədlərlə AŞ PA-nın yüksək vəzifəli şəxslərinin və başqa şəxslərin bank hesablarına köçürülüb.

Hesabat müzakirə edilən zaman MONEYVAL katibliyi qeyd edib ki, son üç il ərzində Azərbaycan "əhəmiyyətli tərəqqi" əldə edib və PY/TMM rejiminin beynəlxalq standartlara uyğunlaşdırılması məqsədilə üzərinə götürdüyü öhdəlikləri böyük ölçüdə yerinə yetirib.

Azərbaycan hökumətinin hesabatında maliyyə sistemində islahatlar üzrə tədbirlər və MONEYVALın tövsiyələrinin icra edilməsindən bəhs edilir. İclasda Maliyyə Bazarlarına Nəzarət Palatasının Direktorlar Şurasının sədri Rüfət Aslanlının rəhbərliyi ilə Azərbaycan nümayəndə heyəti iştirak edib.

Maraqlıdır ki, Maliyyə Nazirliyi ABB-nin faktiki iflasının səbəbləri sırasında guya qiymətli kağızların girovluğu ilə təmin edilmiş hansısa layihələri həyata keçirmək üçün milyardlarla ABŞ dollarının ofşor hesablarına köçürülməsini qeyd edib. Bu vəsaitlərin taleyi məlum deyil. Hökumət beynəlxalq KİV-də $2,9 mlrd vəsaitin yuyulması barədə gedən qalmaqallı informasiyalara reaksiya vermir. Bu şübhəli bank əməliyyatları ilə bağlı cinayət işi də açılmayıb. --08D--