Nəqliyyat naziri ictimai nəqliyyatda gediş haqqının artırılması planından danışdı

Nəqliyyat Nazirliyi Tarif Şurasına şəhər avtomobil ictimai nəqliyyatında gediş haqqına yenidən baxılmasını təklif edib. Sonuncu dəfə avtobuslarda qiymət artımı 2007-ci ilin fevralında olub. 

Nəqliyyat naziri Ziya Məmmədov jurnalistlərə deyib ki, «avtobuslarda sərnişin daşınmasının maya dəyəri qiymətdən bahadır». Ona görə daşıyıcılar Nəqliyyat Nazirliyindən xahiş edib ki, gediş haqqı artırılsın. Hansı şirkətlərin müraciət etdiyini və artımın nə qədər istənuildiyini nazir açıqlamayıb. Tarif Şurasının müraciətə nə vaxt baxacağını da nazir bilmir. 

Maraqlıdır ki, Ziya Məmmədov yenidən Bakıda avtobuslarda kart ödəniş sisteminə keçilməsi vaxtını uzadıb. Onun sözlərinə görə, bu, 1-2 il çəkəcək. 

2007-ci ilin fevralına kimi Bakıda avtobuslarda minimal gediş haqqı 10 qəpik idi. O zaman TŞ tarifi 100% artırdı və şəhər avtomobil ictimai nəqliyyatında (taksi istisna) maksimal gediş haqqını 90 qəpiyə qaldırdı. 

Azərbaycanda gediş haqqı birbaşa sürücüyə ödənilir. Marşrutdan asılı olaraq daşıyıcılar sürücülərə plan qoyur (120-200 manat). Sürücü bunu mütləq ödəməlidir. Bunun üçün sürücü işə qəbul edilərkən depozit ödəyir. Formal olaraq onlar ştatlı işçi sayılır və minimal əmək haqqı alırlar  (93,5 manat). Turan-la söhbətində №90 marşrutun sürücüsü bildirib ki, kart sisteminin tətbiqi avtobus şirkətlərinə əlverişli deyil. Belə ki, sürücülər müəyyən sosial və əmək qarantiyası əldə edəcək, şirkətlərin qazancı azalacaq, çünki sürücülər hər sərnişin üçün çalışmayacaq. Rəsmi statistikaya görə, ölkədə avtobus daşıyıcılığı çox rentabellidir. Dövlətstatkoma görə, 2012-ci ildə sərnişin daşımalarından 419,4 mln manat gəlir olub. Bu, əvvəlki ildəkindən 4,1% çoxdur. Daşıma xərcləri 18,6% artıb və daha az – 168,6 mln manat olub. 08