Rüstəm İbrahimbəyov: Rusiya ilə Azərbaycanın arası çox sazdır - iki-üç aydan bir Moskvada pul paylayırlar

“Milli Şura ona görə lazımdır ki, qarşıda seçkilər var. Xalqımız bu seçkilərin çox yox, bir balaca şəffaf və ədalətli olmasını istəyirsə, kimsə bu işə əmək sərf etməlidir. Demokratik qüvvələr birləşib bu işlə daha səmərəli məşğul ola bilər”. Bu  barədə Ziyalılar Forumunun təşəbbüskarlarından olan Rüstəm İbrahimbəyov Azadlıq radiosuna müsahibəsində bildirib.

Onun fikrincə, birləşmənin cürbəcür formaları var. “Bunun adını Milli Şura da qoymaq olar, demokratik qüvvələrin birliyi də. Azərbaycan Cümhuriyyəti yarananda da bu işə Milli Şura başlamışdı. Belə fikrə gəldik ki, bu ad həmin birlik üçün daha uyğun olar. Birinci məqsəd – seçkidir. Seçkidən sonra bir keçid dövrü yaranacaq. Bu keçid müddətində bir proqram hazırlamaq lazımdır ki, gələcəkdə cəmiyyət necə yaşayacaq, necə olacaq?  Milli Şura həmin vəzifəni öhdəsinə götürə bilər”. 

İbrahimbəyov Milli Şura ideyasını irəli sürəndən sonra ən tanınmış partiya liderləri işi öz öhdələrinə götürüb və bu birliyi yaratmağa başlayıb. 

“Amma görürəm ki, vaxt getsə də, ortaya bir qərar çıxara bilmirlər. Ona görə məcbur qalıb bu bəyanatla onlara müraciət etdim ki, bu işlər bir az yerindən tərpənsin. Axı bu vaxtadək bir nəticə yoxdur. 

EL Hərəkatı, Müsavat və Xalq Cəbhəsi partiyaları bir neçə dəfə görüşüblər. Öz aralarında bir neçə yaxşı qərar da qəbul ediblər ki, başqa partiyaları da dəvət etsinlər, müxtəlif təşkilatları, o sıradan hüquq-müdafiə təşkilatlarını, tanınmış adamları da. Amma hələlik söz olaraq qalıb. Nə  real bir siyahı var, nə də təkliflər. Görüşürlər, prinsipləri elan edirlər, amma nəticə yoxdur”.

O, ölkədə korrupsiya hallarının artmaqda davam etdiyini və günahsız insanların həbsə atıldığını bildirib. “Axır vaxtlar siyasi repressiyalar qat-qat artıb. Günahsız-səbəbsiz adamları, xüsusən gəncləri həbs edirlər. Nə var-nə var, bunlar fikirlərini söyləyiblər, mitinqlərə gediblər. Problem Qarabağ problemidir, veteranların taleyidir ki, hökumət onlara kömək etmir, qaçqınlar qalıb belə. Pullar yeyilir, korrupsiya artır. Vəziyyət çox gərgindir. Camaat çox narazıdır. Orda-burda bu narazılıqların nəticələrini görürük. Çıxışlar, nümayişlər, tətillər olur”.

İbrahimbəyovun fikrincə, hökumət islahatlara başlamasa, vəziyyət daha da gərginləşəcək. “Mənə elə gəlir ki, iqtidar yaxın müddətdə siyasətini dəyişdirməsə, qaldırdığımız məsələlərə cavab verməsə, oturub dialoqa başlamasa, camaat ayağa qalxacaq. Camaat ayağa qalxanda da çox pis vəziyyət yaranacaq, xaos olacaq. Biz bunu artıq görmüşük, nəticələrini də bilirik. Ona görə də iqtidar siyasətini dəyişdirməlidir. Cəmiyyətlə dialoqa başlamalı, islahatlar keçirməlidir. Korrupsiyanın səviyyəsi azaldılmalıdır”. 

Kinorejissor Moskvada təhlükələrin çox olduğundan narahatdır. “Moskva da təhlükəlidir. Mənim üçün özümü ən rahat hiss etdiyim yer ABŞ-dır. Orada mənim üçün təhlükəsizlik zəmanəti var. Rusiya isə yox. Rusiyada bunların imkanları çoxdur. Mənim mühafizəçilərim var. Hər gün küçəyə çıxanda, oraya-buraya baxıb gözləyirəm başıma nə gətirəcəklər”.

O, Milli Şura ideyasının Moskva ilə bağlılığı barədə fikrilərə qarşı çıxıb. 

“Rusiyanın bizdən beşbetər bir hökuməti var. Korrupsiyadır, filandır – bunların səviyyəsi bizimkindən də bəlkə artıqdır. Azərbaycanın prezidenti onları çox qane edir. Bir yerdə öz siyasətlərini yürüdürlər. Onların nə işinə qalıb ki, Azərbaycanda demokratiya olsun. Azərbaycanda demokratiya Rusiyaya lazımdır? Rusiyanın başqa məqsədləri var. Rusiya istəyir ki, Azərbaycan-Ermənistan münaqişəsi uzansın, açar Rusiyanın əlində qalsın. Rusiyanın siyasəti sovet vaxtından yaranıb, hamıya da aydındır. Bu şaiyələri yayan iqtidardır, iqtidara işləyən siyasətçilər, partiyalar, iqtidara işləyən mediadır. Çünki istəyirlər bu ideyanı xalqın gözündən salsınlar. Mənə elə gəlir ki, Amerika istəyir ki, Azərbaycanda doğrudan da, başqa yerlərdə olduğu kimi, demokratik islahatlar aparılsın. Amma hər şey bizim öz əlimizdədir. Biz özümüz hərəkət etməsək, heç kəs bu işə qarışmayacaq, kömək etməyəcək”.

İbrahimbəyov Rusiyanın Azərbaycandan narazı olması ilə bağlı yayılan fikirləri qəbul etmir. Rusiyanın çox görkəmli siyasət texnoloqları oturub Azərbaycanda iqtidara kömək edir.

“Yalandan deyirlər ki, guya Rusiyadan narazıdırlar. Elə deyil, araları çox sazdır. Hər iki-üç aydan buraya  (Moskva nəzərdə tutulur – K.D.) gəlirlər, çamadanla pul gətirib paylayırlar. Bunlar da çox razıdırlar onlardan”. -03D-