Noyabr ayinda imb-da qiymətlər 2,1% artib

Noyabr ayında İlkin Mənzil Bazarında (İMB) 1 kv.m üzrə orta qiymət göstəricisi  ötən aya nisbətən 2,1% artıb.  Eyni vəziyyət  Respublikanın digər böyük şəhərlərində də müşahidə edilmişdir. Son bir ayda İMB-da orta qiymət indeksi 1 kv/metr üçün 922 manat civarında qərarlaşıb.  Qiymət artımı ötən rübün müvafiq dövrü ilə müqayisədə 4%, ötən ilə nisbətən isə 13,1% qeydə alınmışdır. Qeyd edək ki, 2008-ci ilin sentyabr ayı (böhran dövrü) ilə müqayisədə qiymətlər 22,8% azalıb, bu ilin əvvəli ilə müqayisədə isə 9,8% artıb.

Noyabrda ilkin mənzil bazarında aparılan monitorinqin nəticələri demeyə imkan verir ki, yeni tikililərin alqı-satqısında qiymət artımı ilə yanaşı həmdə aktivlik müşahidə olunmuşdur.  Tam kommunal şəraitli (istilik sistemi və ya maye qazı), 2-3 otaqlı, orta mərtəbəli, 1 kv.m 800-1000 manat məbləğində, sənədli (çıxarışı olan) mənzillərə olan tələbat noyabrda da yüksək olub.Ay ərzində ən cəlb edici rayonlar Yasamal, Xətai və Nəsimi rayonları оlmuşdur. Qeyd edilən üç rayon üzrə tikintisi aparılan binaların ümumi tikinti portfelindəki payı bazarın 2/3 hissəsini təşkil edib. Son bir ayda İMB-da təklif olunan, binaların sayı 395 , tikinti şirkətlərinin sayı isə əvvəlki aydakı 123-dən azalaraq 122-yə düşüb.

Ekspertlər hesab edirlər ki, İlkin Mənzil bazarında qiymətlərin bahalaşması daşınmaz əmlak bazarındakı ümumi bahalaşma tendensiyasının nəticəsidir. Bununla yanaşı son aylarda İMB-da alıcılıq qabiliyyətinin yüksəlməsi də qiymətlərin bahalaşmasına öz təsirini göstərmişdir. Hələdə İMB-da satışa çıxarılan mənzillərin rəsmi  alqı-satqı əməliyyatı üçün sənədlərinin qaydaya uyğun olmaması, binaların uzun müddət qazsız və digər təchizatsız qalmaları, tikilən binalarda daha çox böyük kvadratlı mənzillərin yer alması və eləcəd inhisarçılıq amilləri bazarın aktivləşməsinə öz mənfi təsirini göstərir. Mütəxəssislər yeni mənzil bazarında satışa çıxarılan mənzillərin ipoteka kreditləşməsinə uyğun gəlməməsini bazarın aktivləşməsinə mənfi təsir göstərən mühüm səbəb hesab edirlər. Günümüzdə ilkin mənzil bazarına mənzil almaq üçün daha çox öz köhnə mənzillərini dəyişənlər və kiçik sahəli mənzil axtaranların üz tutduqları qeyd edirlər.  Daşınmaz Əmlak bazarında vasitəçi kimi çalışan mütəxəssislərdən biri mövcüd vəziyyəti belə şərh etdi” İlkin Mənzil Bazarında satışa çıxan binalarda kiçik sahəli mənzilləri tapmaq demək olar ki problemə çevrilmişdir. Kvadrata əsasən mənzilin qiyməti ucuz olduğu üçün alıcısı kifayət qədər var, böyük kvadratlı mənzilləri isə hətta 7-8 ildən artıq istifadəyə verilmiş binalarda tapmaq mümkündür. 

Yaxın günlərdə İMB-da sabitliyin müşahidə olunacağı proqnozlaşdırılır.