PaşaBank Bank of Baku-nun 10 mln AZN istiqrazlarını yerləşdirib

Azərbaycanın aparıcı korporativ banklarından biri olan PAŞA Bank “Bank of Baku” ASC-in istiqrazlarının yerləşdirilməsi üzrə anderrayter və marketmeyker qismində çıxış edib. 

Emissiyanın ümumi məbləği 10 mln. manat, təminatsız qiymətli kağızların dövriyyə müddəti  3 il, kupon faiz dərəcəsi rüblük ödənişlər üzrə illik 12% təşkil edib. Nominal dəyəri 1000 manat olmaqla cəmi 10000 ədəd istiqraz buraxılıb. “Bank of Baku” ASC-in istiqrazlarının Bakı Fond Birjasında (BFB) yerləşdirilməsi PAŞA Kapitalın iştirakı ilə açıq abunə yolu ilə aparılıb.

 PAŞA Bankın İdarə Heyətinin üzvü, investisiyalar üzrə baş direktor (CIO) Taleh Kazımovun sözlərinə görə, yerli bazarda artıq ikinci dəfədir ki, bizim bank başqa bir bankın istiqrazlarını yerləşdirir. “Həmçinin bu, bizim tərəfimizdən 7-ci dəfədir ki, 1,5 ildən də az bir müddət ərzində şirkətlərin istiqrazlarını birjada yerləşdiririk. PAŞA Bank yeni emitentlərin buraxılışını təşkil etməklə, peşəkar bazar iştirakçısı kimi öz mövqelərinin möhkəmləndirilməsi istiqamətində fəaliyyətini qurur. Bu da öz növbəsində, qiymətli kağızların təkrar bazarının bütövlükdə inkişafına müsbət təsir edəcək”.

Bank of Baku ASC-nin İH sədrinin müavini Zaur Qaraisayev qeyd edib ki, bank diversifikasiya üzrə iş aparır. «10 mln manat məbləğində istiqraz buraxılışı fiziki şəxslərin depoziti ilə beynəlxalq maliyyə institutlarından cəlb edilən vəsait arasında balans yaratmaq üçündür. İstqirazların müddətinin 3 il olması bizim bazar üçün uzun müddətdir. Bu müddətə əsasən fiziki şəxslərin depozitlərini qəbul etmək olar. Bu buraxılış Bank of Baku ilə PASHA Bank arasında ilk əməliyyatdır. Bankımıza olan etimada görə təşəkkür edirik. Əminəm ki, bu əməliyyat gələcək uğurlu münasibətlərin rəhni olacaq”, - deyə Qaraisayev qeyd edib. 

Xatırladaq ki, ötən ilin yekunlarına əsasən, PAŞA Bank tərəfindən 70 mln AZN-ə bərabər olan 4 emitent korporativ istiqraz vərəqəsi buraxılıb. T.Kazımovun qeyd etdiyinə görə, 25 iyun 2012-ci ildə UniLeasing QSC tərəfindən 1,5 il müddətinə buraxdığı 5 mln AZN məbləğində birinci emissiya bondu ödənilib, daha əvvəl -  noyabrın 21-də yenə də həmin emitentin analoji məbləğdə illik kağızı ödənilib. “Sonradan iyun kağızı yenidən elə həmin şərtlərlə buraxılıb və hazırda gündəlik əsaslarla PAŞA Bank tərəfindən qiymət təyin olunur. PAŞA Bankın marketmeyker kimi çıxış etdiyi istiqraz vərəqələri üzrə bütün qiymət təyin etmələrini Bloomberg, Reuters terminalları vasitəsilə, eləcə də BFB-nın saytında izləmək olar”, - deyə T.Kazımov qeyd edib. 

Həmçinin 2012-ci ilin ortalarında PASHA Bank Baghlan Group-un $150 mln dollar avrobondlarının yerləşdirilməsində ko-menecer kimi çıxış edib. Bu, Azərbaycanın bank bazarında ilk belə hadisə idi. PASHA Bank-ın investisiya istiqamətli fəaliyyəti yüksək qiymətləndirilib və bank EMEA Finance beynəlxalq maliyyə jurnalının «Azərbaycanınn ən yaxşı investisiya bankı » nominasiyasında mükafat alıb. –15D--