QK bazarında pulların yuyulması ilə yeni qaydalarla mübarizə aparılacaq

Qiymətli Kağızlar üzrə Dövlət Komitəsi (QKDK) «Cinayət yolu ilə əldə edilmiş pul vəsaitlərinin və ya digər əmlakın leqallaşdırılmasına və terrorçuluğun maliyyələşdirilməsinə qarşı mübarizə haqqında» Azərbaycan Respublikası Qanununun tələblərinə əməl edilməsinə nəzarətin həyata keçirilməsi” qaydalarına dəyişiklik edib. Qaydalar 17 fevral 2012-ci ildə qəbul edilib. Qiymətli kağızlar bazarında əməliyyatlar qeyri-şəffaf olsa da, bu qaydaların pozulması barədə məlumat verilmir. 

QKDK qiymətli kağızlar bazarında maliyyə əməliyyatları üzrə hesabatın yeni formasını təsdiq edib. Hesabat formasına redaksiya xarakterli dəyişikliklər edilib. Amma əvvəlki dövrdən fərqli olaraq, bundan sonra monitorinq iştirakçıları 20 min manatdan artıq əməliyyatları və qeyri-maliyyə institutları ilə əqdləri ayrıca sətirlə verməyəcək. Əvəzinə monitorinq iştirakçıları şübhə doğuran əməliyyatlar barədə məlumat verəcəklər. 

Qeyd edək ki, çirkli pulların yuyulması və terrorçuluğun maliyyələşdirilməsinə qarşı mübarizə məqsədi ilə QK bazarında fəaliyyət göstərən brokerlərdən müştərilərlə bağlanan müqavilələr, xarici müştərilər, etibarnamə ilə çıxış edən müştərilər, siyasi xadimlərlə bağlanan əqdlər barədə informasiya vermək tələb olunur. Hesabatda əqdlərin sayı və məbləği barədə, o cümlədən nağd əməliyyat və xaricdən maliyyələşmə barədə məlumat verilməlidir. Monitorinq iştirakçıları AMB yanında Maliyyə Monitorinqi Xidmətinə pulların leqallaşdırılması və terrorçuluğun maliyyələşdirilməsi ehtimalı olan əməliyyatlar barədə məlumat verməlidir. 

Bu sənəd brokerlər, lotereya təşkilatçıları, aktivlərin idarə edilməsi üzrə peşəkar fəaliyyəti həyata keçirənlər, habelə investisiya fondlarına şamil edilir. Son ikisi hələ ölkədə yoxdur. Qaydaların tələblərinin icrası barədə hər rüb QKDK-ya hesabat verilməlidir. 

QKDK indiyəcən bir dəfə də olsun brokelər və “Azərlotereya” ASC tərəfindən bu tələblərin pozulması barədə məlumat verməyib. MMX isə QK bazarında şübhəli əməliyyatlar barədə cəmiyyəti məlumatlandırmayıb. 

Qeyd edək ki, özəl şirkətlərin səhmlərinin yerləşdirilməsi üzrə əməliyyatların bir hissəsi (əsasən banklar və sığorta şirkətləri) nağd formada həyata keçirilir və müəyyən hissəsi mənfəət hesabına təşkil edilir. Söhbət on milyonlarla manatdan gedir. Səhmlərin təkrar bazarında əqdlər birjadan kənarda bağlanılır. QKDK-nın qaydalarına əsasən, birjadankənar əməliyyatlar barədə müfəssəl informasiyanı Bakı Fond Birjası yayamalıdır. Amma 2012-ci ilin martından BFB naməlum səbəblərdən bu məlumatları yaymağı dayandırıb. Birjanın məlumatına görə, bu il yanvarın 25-dən fevralın 25-dək birjadankənar 817 min səhm üzrə 35,7 mln manatlıq əqd bağlanılıb. 08B