Sənayedə orta əmək haqqı neftçilərin hesabına artır

Sənayedə orta aylıq əmək haqqı 600 manata yaxınlaşır. Ötən ilin yanvar-noyabrında sənaye işçilərinin orta maaşı 2011-ci ilin eyni dövrü ilə müqayisədə 15% artaraq 598 manata çatıb. Neftçilər isə ayda 800 manat və daha çox alıblar. 

Dövlətstatkoma görə, 2011-ci ilin yanvar-noyabrında sənayenin dövlət sektorunda (neft hasilatı, energetika, su təsərrüfatı, kimya sənayesi və s.) orta aylıq əmək haqqı 2011-ci ilin eyni dövrü ilə müqayisədə 16,6% artaraq 525 manat olub. Sənayenin özəl sektorunda müəssisələr əmək haqqını orta hesabla 12% artırıb. Bu sektorun işçiləri 694 manat alır. 

DSK-ya görə, hasilat sənayesi işçiləri (36,3 min nəfər) 2012-ci ilin yanvar-noyabrında orta hesabla 1398 manat (+18,9%) alıblar. Müəyyən artım olsa da (+12,4%), emal sənayesində orta aylıq əmək haqqı muzdluların əmək haqqından (391 manat) 6 manat çoxdur. Emal sənayesində sənaye sektorundakıların 48%-i (82,7 min) çalışır.

Sənaye sektorunun bir çox sahələrində orta aylıq əmək haqqı çox aşağıdır. Yeganə tütün istehsalçısı “European Tobacco Baku” ötən il əmək haqqını 0,7% azaldıb. Tikiş (-1,7%) və metallurgiya sənayesində (-1,4%) də maaş azalıb. Orda orta aylıq əmək haqqı 259 və 546 manatdır. Ərzaq istehsalında orta hesabla 253 (+9,1%), işçi istehsalında 315 manat (+6%) və s. maaş verilir.

Ən az maaş alan zərgərlər – 240 manat (+24,6%) və elektrik avadanlığı istehsal edənlərdir – 239 manat (-5,6%). 08B