«Şirkətlərdə korporativ idarəetmənin qiymətləndirilməsi metodologiyası»nın təqdimatı keçirilib

Bu gün Bakıda “Şirkətlərdə korporativ idarəetmənin qiymətləndirilməsi metodologiyası»nın təqdimatı keçirilib. Onu İqtisadi İnkişaf Nazirliyi Beynəlxalq Maliyyə Korporasiyası ilə birgə hazırlayıb. Sənəd Azərbaycan şirkətlərində korporativ idarəetmə standartlarının inkişafına, bazarlarda onların rəqabət qabiliyyətinin artırılmasına yönəldilib. 

İİN korporativ idarəetmə şöbəsinin müdiri Anar Hacızadə bildirib ki, metodologiya OECD korporativ idarəetmə prinsipləri və Azərbaycan korporativ idarəetmə standartları nəzərə alınmqla hazırlanıb. Onlar şirkətlər üçün könüllüdür və 9 meyardan ibarətdir. Onların sırasında səhmdarların ümumi yığıncağının təşkili və keçirilməsi, minoritar səhmdarların maraq və hüquqlarının nəzərə alınması, səhmdarların ümumi yığıncağı, Müşahidə Şurası və icra orqanı arasında səlahiyyət bölgüsü, səhmdarların hüquqlarına əməl edilməsi, şəffaflıq və hesabatlılıq, müstəqil və daxili auditin keçirilməsi, maraqların toqquşması ilə bağlı münaqişələrin həlli və s. var. Hacızadənin sözlərinə görə, bu gün təxminən 50 şirkət çalışır ki, 2011-ci ilin yanvarında qəbul edilən Azərbaycan korporativ idarəetmə standartlarına uyğunlaşsın. 

Təqdimatda çıxış edən Avropa və Mərkəzi Asiya üzrə korporativ idarəetmə proqramının meneceri Oliver Orton və İsveçrənin İqtisadi Məsələlər üzrə Katibliyinin Cənubi Qafqaz üzrə regional direktorunun müavini Matias Feldman qeyd ediblər ki, şirkətlər korporativ idarəetmə prinsiplərinə uyğunluq səviyyəsini qiymətləndirərək kapital bazarına çıxmaqla investisya cəlb etmə qabiliyyətləri barədə suala cavab verə bilərlər. Ortonun fikrincə, Azərbaycan şirkətləri korporativ idarəetmə standartlarına keçidin ilkin mərhələsindədirlər.  

Təqdimatda həmçinin Almaniya Korporativ İdarəetmə Komissiyasının üzvü Kristian Strencer çıxış edərək ölkənin inkişafında korporativ idarəetmənin rolundan danışıb. 

“Korporativ idarəetmənin qiymətləndirilməsi metodologiyası”ndan səhmdar cəmiyyətləri və məhdud məsuliyyətli cəmiyyətlər istifadə edə bilər. Sənədin surəti İİN-in saytında yerləşdirilib. 08C