Su nəqliyyatı vasitələri istehsalçıları bir çox vergilərdən azad edilib

İqtisadiyyat və Sənaye Nazirliyi Vergilər Məcəlləsinə əlavələr haqqında qanun layihəsi hazırlayıb. Sənədə əsasən, su nəqliyyatı vasitələri istehsalçıları bir çox vergilərdən azad edilib.

Dövlət başçısının qərarı ilə yaradılan sənaye parkının su nəqliyyatı vasitələrinin istehsalçısı olan, sənaye parkında fəaliyyət göstərən hüquqi şəxs və ya hüquqi şəxs yaratmadan sahibkarlıq fəaliyyətini həyata keçirən fiziki şəxs tərəfindən və ya onun adından ödənilən faizlərdən, o cümlədən maliyyə lizinqi əməliyyatları üzrə ödənilən ssuda faizlərindən ödəmə mənbəyində vergi tutulmayacaq.

Qeyri-rezident podratçı və subpodratçı tərəfindən təqdim edilən mallar, görülən işlər və göstərilən xidmətlərə görə ödənişlərdən, riskin sığortasına və ya təkrar sığortasına dair müqaviləyə uyğun olaraq sığorta ödənişlərindən, beynəlxalq rabitə və ya beynəlxalq daşımalar həyata keçirilərkən rabitə və nəqliyyat xidmətləri üçün ödənişlərdən də ödəmə mənbəyində vergi tutulmayacaq.

Sənaye parkında gəmi tikintisi və təmiri ilə bağlı sifarişçiyə, podratçı və subpodratçı tərəfindən həmin rezidentə və ya podratçıya və subpodratçıya təqdim edilən mallar, görülən işlər və göstərilən xidmətlərə görə ƏDV sıfır dərəcəsi ilə tutulacaq.

Bu Qanunun 2016-cı ilin 1 mart tarixindən qüvvəyə minməsi planlaşdırılır.

Qeyd edək ki, iyunun əvvəlində Qaradağ Sənaye Parkı yaradılıb. SOCAR-ın istifadəsndə olan  72 ha torpaq sahəsi onun daimi istifadəsinə verilib. O vaxt hökumətə tapşırılıb ki, Qaradağ Sənaye Parkında gəmiqayırma sənayesinin inkişafının stimullaşdırılması üzrə təkliflər hazırlasın. 2013-cü ildə burda Bakı Gəmiqayırma zavodu istismara verilib. O, SOCAR (65%), «Azərbaycan İnvestisiya Şirkəti» (25%) və “Keppel Offshore and Marine” şirkətlərinə məxsusdur. 08D