Türkmənistan prezidenti avrokomissarla görüşdən niyə imtina edib?

Avropa Komissiyasının energetika üzrə komissarı Günter Ottingerin Azərbaycan və Türkmənistana sentyabrın əvvəlindəki səfərinin xüsusi önəmi vardı. Onun nəticəsində AK üçün xüsusi hesabat hazırlanmalı, Transxəzər qaz kəməri üzrə bir il müddətində rəsmi Bakı və Aşqabad ilə danışıqlara yekun vurulmalı idi. Bu barədə Turan-a Avropa İttifaqındakı mənbə bildirib. 

Aİ Şurası 12 sentyabr 2011-ci ildə Transxəzər qaz kəməri tikintisi üzrə Azərbaycan və Türkmənistanla hüquqi sənəd imzalanması barədə danışıqlar aparılması üzrə mandatı təsdiq edib. 

Azərbaycanda Ottinger prezident tərəfindən qəbul edilib. İlham Əliyevlə təkcə “tranzit arzusu və imkanları” yox, ölkənin xaricdə həyata keçiriləcək perspektiv infrastruktur layihələri müzakirə olunub. Bakının bu mövqeyini avrokomissar məmnunluqla qəbul edib. 

Amma Aşqabadda Ottingerin ovqatı, yəqin ki, pozulub: O, nə ölkə başçısı Q.Berdımuhəmmədovla, nə də XİN başçısı ilə görüşə bilib. 

Türkmənistan prezidenti avrokomissarla görüşdən niyə imtina edib?

Axı Berdımuhəmmədov daim Avropaya qaz tədarükünə hazır olduğunu deyir və  vurğulayır ki, “Xəzərin dibi ilə qaz kəməri çəkilməsi ərazisindən boru keçən ölkələrin işidir”.

Görünür, bu bəyanatlar konyunktur xarakteri daşıyır, iqtisadi ünsürdən məhrumdur. Aşqabad Transxəzər qaz kəməri çəkilən zaman maliyyə, ekoloji və təhlükəsizlik risklərini bölüşmək istəmir və bütün məsuliyyəti boru çəkən şirkətlərin üzərinə atmaq istəyir. Bu kəmərlə qaz tədarükünün sabitliyi üçün Qərb arzu edir ki, onun şirkətlərinə quruda PSA-sazişlər verilsin. Berdımuhəmmədov bunu istəmir. Türkmənistanın şərqindəki yataqlardakı qazı Xəzər sahilinə çatdırmaq üçün daxili Şərq-Qərb magistral qaz kəmərinin tikintisi başa çatmalıdır. Aşqabad burada da aktivləri başqa iştirakçılarla bölmək istəmir. 

Belə getsə, Transxəzər qaz kəmərinin tilkintisi çətin ki baş tutsun. --12A—