Vətəndaş cəmiyyəti sahibkarlıq sahəsində ciddi islahatlar gözləyir

 Bu gün Hilton Baku otelində USAID-in dəstəyi ilə «Azərbaycanda sahibkarlığın inkişafı» konfransı keçirilib.

Təşkilatçı “Bazar İqtisadiyyatının İnkişafına Kömək” Fondunun rəhbəri Sabit Bağırovun sözlərinə görə, tədbir ölkə prezidentinin  3 mart tarixli «Sahibkarlığın inkişafı üzrə əlavə tədbirlər haqqında» fərmanının icrası ilə bağlıdır. Sənədin əsas xüsusiyyəti bu tədbirlər üçün məsul nazirlik və qurumların dairəsinin (cəmi 18) müəyyən edilməsidir.

Bağırovun fikrincə, Azərbaycanın Doing Business-2015 (indiki siyahıda 189 ölkə arasında 70-ci) reytinqini yaxşılaşdırmaq imkanı var. Bunun üçün sahibkarlıq fəaliyyəti ilə məşğul olacaq hüquqi və fiziki şəxslərin elektron qeydiyyatı prosedur və müddətinin azaldılması üçün qanunvericilikdə dəyişiklik edilməlidir. Bundan başqa, tikintiyə icazə, elektrik təchizatına qoşulmanın, daşınmaz əmlak hüququnun qeydiyyatının müddəti, prosedur sayı, pul xərcləri azaldılmalıdır.

Kreditlərin verilməsinə təsir edən institutların fəaliyyəti təkmilləşdirilməli, investorların hüquqları müdafiə edilməli, idxal-ixrac əməliyyatlarında tələb olunan sənədlərin sayı, müddəti, xərcləri azaldılmalıdır. Biznes strukturlar bağlananda iflas proseduru ilə bağlı problemlər də var.

İqtisadi Tədqiqatlar Mərkəzinin sədri Qalib Toğrulun sözlərinə görə, ölkədə biznes üçün normal mühit yoxdur. Hətta rəsmi resurs  (http://russian.doingbusiness.org/data/exploreeconomies/azerbaijan) hesab edir ki, ölkədə cəmi 3 sahədə vəziyyət yaxşılaşıb – müəssisələrin qeydiyyatı dünyada 10-cudur (əvvəl 16-cı), vaxtı keçmiş və uzadılmış kreditlər azalıb, vergi ödənişində 79-cu yerdən 77-yə yüksəlmişik.

Qalan 7 növ üzrə vəziyyət pisləşib. Tikintiyə icazə məsələsi daha acınacaqlıdır. Mənasız yazışmalar və 9 ay çəkən 28 icbari prosedur üzündən Azərbaycan 180-cidir (əvvəl 179-cu).

İqtisadiyyat və Sənaye Nazirliyinin məlumatına görə, 1 yanvar üçün 445 min sahibkar qeydiyyata alınıb. Ən populyar sektor kiçik ticarətdir –69,6% . Müəssisələrin 10,1%-i nəqliyyat, 3,5% otel biznesi ilə məşğuldur. Dörd müəssisədən üçündə əməkdaşların sayı gizlədilir.

"Doing-Business-2014” 10 sahə üzrə hazırlanıb. Postsovet məkanında ən yaxşı yer Gürcüstanındır (8-ci), Azərbaycanı Litva (17-ci), Estoniya (22-ci), Latviya (24-cü), Ermənistan (37-ci), Qazaxıstan (50-ci), Belarus (63-cü) və Qırğızıstan (68-ci) qabaqlayır.

Gürcüstandan başqa onluqda Sinqapur, Honkonq, Yeni Zelandiya, ABŞ, Danimarka, Malayziya, Cənubi Koreya, Norveç və Böyük Britaniya var.

Siyahıya 4 ölkə əlavə edilib: Liviya, Myanma, San-Marino, Cənubi Sudan. --17D—