![Azərbaycan Dövlət Rus Dram Teatrında «Sənətkarın taleyi» tamaşasının premyerası keçirilib](https://turan.az/resized/media/2016/main/052300156959-750-500-resize.webp)
- Mədəniyyət
- 23 May 2016, 15:33
- 111
Azərbaycan Dövlət Rus Dram Teatrında «Sənətkarın taleyi» tamaşasının premyerası keçirilib
Mayın 20-də S.Vurğun adına Azərbaycan Dövlət Rus Dram Teatrında Xalq Yazıçısı Elçinin pyesi əsasında hazırlanmış “Sənətkarın taleyi” (“Sudba artista”) tamaşasının premyerası keçirilib.
Premyeradan əvvəl Xalq Yazıçısı Elçin jurnalistlərə müsahibə verib. Pyesin səhnə həyatı barədə danışan yazıçı bildirib ki, 2013-cü ildə bu əsər Azərbaycan Dövlət Akademik Milli Dram Teatrında “Sənətkarın taleyi” adı ilə tamaşaya qoyulub. Tamaşaya Səməd Vurğun adına Azərbaycan Dövlət Rus Dram Teatrının rejissoru, Xalq Artisti İrana Tağızadə quruluş vermişdi. O zaman yüksək bədii-estetik səviyyəli bir tamaşa alınmışdı.
Xalq Yazıçısı deyib: “Dövlət Rus Dram Teatrının Azərbaycan dramaturgiyasının təbliğində çox böyük ənənələri, istedadlı, böyük potensial imkanları olan kollektivi var. Mənim üçün də çox xoşdur ki, bu gün bu tamaşa burada oynanılır”. Tamaşa hazırlanarkən məşq proseslərində iştirak etməyə vaxtının olmadığını deyən müəllif səhnə əsərinin tamaşaçıların xoşuna gələcəyinə ümidvar olduğunu bildirib. Pyesin Hüseyn Ərəblinski haqqında olduğunu söyləyən yazıçı əslində bu obrazın rəmzi səciyyə daşıdığını vurğulayaraq deyib: “Söhbət sənətkar və zamandan, sənətkar və cəmiyyətdən, sənətkar və xalqdan gedir. Sadə həyat keçirən, pulsuz, kasıb artistlərin sənətə bağlılığı, bütün təhqirlərə, çətinliklərə, sıxıntılara dözmələri – bütün bunların hamısı sənətin, səhnənin naminə olub. Bu baxımdan Hüseyn Ərəblinski Azərbaycan teatrı tarixində, ümumiyyətlə, Azərbaycan mədəniyyəti tarixində böyük xidmətləri olan bir şəxsiyyət və sənətkardır. O, pyesdə məhz bu cür sənətkarların ümumiləşdirilmiş obrazıdır”.
Mədəniyyət və Turizm Nazirliyi Qeyd edir ki, tamaşanın premyerasında rəsmi şəxslər, mədəniyyət və incəsənət xadimləri, ictimaiyyət nümayəndələri, teatrsevərlər iştirak ediblər.
Pərdə açılarkən tamaşaçılara edilən müraciətdən də göründüyü kimi, Hüseyn Ərəblinskiyə həsr edilmiş bu əsər avtobioqrafik xarakter daşımır. Əsər böyük aktyorun yaradıcılıq aləmini tərənnüm edir. Tamaşanın əvvəlində qaranlıq səhnəyə əlində fənər tutmuş bir teatr personajı çıxır və səhnədə “Otello” tamaşasının afişasını asır, Otello rolunun Ərəblinskinin oynayacağını təntənəli surətdə elan edir. Sonra səhnədə deyingən, artistlərə hədə-qorxu gələn obrazlar görünür. Onlar cahil və mövhumatçı insanlar, qoçular, mollalardır. Bu səhnə Ərəblinski sənətinin düşmənlərinin kim olduğunu göstərir.
İkihissəli tamaşa təsirli səhnələrlə yadda qalır. Bu əsərdə Hüseyn Ərəblinski dövrünün atmosferi - o zamanlar neft bumu yaşayan Bakı həyatı da, çarizmin Bakıya münasibəti də ustalıqla təsvir edilib. Ən əsası isə fədakar sənətkar və zaman problemi çox yüksək bədii-estetik həllini tapıb.
Tamaşada Hüseyn Ərəblinski obrazını Əməkdar Artist Firdovsi Atakişiyev canlandırıb. Səhnə tərtibatını Mustafa Mustafayev, musiqi tərtibatını Əməkdar Mədəniyyət İşçisi Vladimir Neverov verib. Geyim üzrə rəssam Əməkdar Mədəniyyət İşçisi Olqa Abbasova, işıq üzrə rəssam isə Nikolay Rudıçevdir.
Tamaşada digər rolları Xalq Artisti Yuri Baliyev, Əməkdar artistlər Ayan Mir-Qasımova, Əsgər Rəhimov, Elmira Aslanova və başqaları canlandırıblar.
Sonda Xalq Yazıçısı Elçin uğurlu tamaşa münasibətilə aktyorları təbrik edib və hər birinə təşəkkürünü çatdırıb.
Mədəniyyət
-
Alen Delon, cazibədar görünüşü və maqnitik varlığı ilə Avropa kinosunu onilliklər ərzində müəyyənləşdirən Fransız kino ikonu, 88 yaşında vəfat edib. Övladları onun ölümünü bazar günü Agence France-Presse-ə verdikləri açıqlama ilə təsdiqləyib.
-
İyulun 9-da Almaniyanın Azərbaycandakı səfirliyinin iqamətgahında gender bərabərliyinə verilən töhfələrə görə 2024-cü il Almaniya-Fransa Gender Bərabərliyi mükafatının təqdimatı olub.
-
Müasir insanın kimlik və həyatda məna axtarışları son zamanlarda bir çox sənətçi tərəfindən müraciət edilən bir mövzudur. YAY Qalereyasında nümayış olunan Rasim Babayev, Elşən Baba, Orxan Hüseynov, Tərlan Qorçu, Aida Mahmudova,Qafar Rzayev, Zamir Süleymanov və ve CHINGIZ-in əsərlərindən ibarət "Hər şey yaxşı olacaq: Sabah ve ya nə vaxtsa" adlı qrup sərgisində müasir insanın həqiqəti, kimlik axtarışları və s. mövzular müxtəlif aspektlərdən işlənib. Sərginin kuratoru Zəhra Məmmədovadır.
-
İnsanlar özlərindən öncəki dövrləri öyrənmək üçün ya internetdə araşdırmalar edir ya filmlərə baxır ya da tamaşaların daimi izləyicisi olur. Mədəniyyət tarixinin bəzi dövrləri vardır ki, hazırda çox da dərindən araşdırılmayıb və Azərbaycan dilində dəqiq, detallı məlumatlar tapmaq isə demək olar ki, mümkün deyil. Belə dövrlərdən biri də 1794-1985-ci illərdə hakimiyyətdə olan Qacarların dövrüdür.
Rəy yaz