Bakıda keçirilən Avropa festivalı proqramında Ukraynadan film

Bakı/15.11.22/Turan: Bakıda 12-ci Avropa Film Festivalı Çexiya istehsalı olan "Sahiblər" ekran əsərinin nümayişi ilə başlayıb.

Çexiyanın Azərbaycandakı səfirinin müavini Daniel Putik açılışda çıxış edib. O, filmin rejissoru və filmlə bağlı məlumat verib.

Bu film festivalı Avropa İttifaqının (Aİ) Azərbaycandakı Nümayəndəliyi, Aİ-yə üzv dövlətlərin Azərbaycandakı səfirlikləri "Landmark" Biznes Mərkəzi və "CinemaPlus" kinoteatrlar şəbəkəsi ilə əməkdaşlıq çərçivəsində təşkil edilib.

Tədbirin açılışında Aİ-nin Azərbaycandakı səfiri Peter Mixalko vurğulayıb ki, bu, pandemiyadan sonra ilk film festivalıdır.

"Çox şadam ki, hər il keçirilən Avropa Film Festivalını biz bu il böyük ekranlara geri gətirə bildik. Bu, "Avropa Komandası" çətiri altında Aİ və Aİ-yə üzv dövlətlərin Azərbaycanda ənənəvi və tanınmış təşəbbüslərindən biridir. Biz azərbaycanlı tamaşaçılara Avropanın ən yeni filmləri, mədəniyyəti və dəyərləri haqqında daha çox məlumat əldə etmək, müzakirələrdə iştirak edib əlaqələr qurmaq imkanı vermək istəyirik", deyə Peter Mixalko bildirib.

Bundan əlavə, diplomat Ukrayna-Rusiya müharibəsinə də toxunub.

Onun sözlərinə görə, Ukrayna hələ ki, Aİ üzvü olmasa da, Avropa ailəsinin bir hissəsidir. "Ukrayna öz azadlığı, suverenliyi uğrunda Rusiyanın təcavüzkar müharibəsinə qarşı döyüşür".

O deyib ki, proqrama Avropa İttifaqına üzv olan 11 ölkədən (Çex Respublikası, Almaniya, Estoniya, Fransa, Xorvatiya, Latviya, Litva, Macarıstan, Rumıniya, Slovakiya, İsveç) və Ukraynadan 12 filmin nümayişi daxildir.

Festivalda Avropa kinematoqrafiyasının ən son tendensiyaları nümayiş olunacaq. Dram, komediya, tarixi, sənədli və s. janrlarda filmlər nümayiş etdiriləcək.

Qeyd edək ki, 2010-cu ildən başlayaraq Avropa Film Festivalları çərçivəsində indiyədək 158 film nümayiş olunub. 16D