2012-ci ildə Azərbaycanda hər QHT orta hesabla 37,5 min manat alıb

2012-ci ildə Azərbaycanda hər qeyri-hökumət təşkilatı orta hesabla 37,5 min manat alıb.

Nazirlər Kabinetinin 2012-ci il üçün hesabatında deyilir ki, Ədliyyə Nazirliyinə ümumi məbləği 39 mln. 542,57 min manat həcmində (ötən illə müqayisədə +21%)   1054 qrant sazişi daxil olub. 

Məlumatda benefisiarların sayı açıqlanmır, lakin qeyd olunur ki, yoxlamaların yekunlarına əsasən 187 təşkilata xəbərdarlıq edilib, bir hal üzrə materiallar cinayət işinin qaldırılması üçün prokurorluğa göndərilib.

QHT-lərə daxilolmaların mənbələri əsasən hökumət strukturları (ötən il QHT-yə Dövlət Dəstəyi Şurası 2 mln. 031 manat məbləğində  348 layihəni, Gənclər və İdman Nazirliyi 851, 59 min manat məbləğində 57 layihəni dəstəkləyib.  İqtisadi İnkişaf Nazirliyi qrant əsasında 8 hüquqi şəxsə  82,44 min manat, $436,29 min və 134,75 min avro ayırıb). Digər mənbələr üzrə tam açıq informasiya yoxdur.

Ölkədə beynəlxalq təşkilatların və qeyri-hökumət fondlarının bir neçə ofisi fəaliyyət göstərir. Xarici dövlətlərin səfirlikləri də qrantlar ayırır. Azərbaycan siyasi hakimiyyətinin xarici qrant verənlərlə qarşılıqlı münasibətləri pisləşir, buna misal olaraq Açıq Cəmiyyət İnstitutu – Soros Fondunun fəaliyyətinin müvəqqəti dayandırılmasını göstərmək olar. 

QHT-lər qeydiyyat və hesabatlılıq problemləri  ilə üzləşirlər. Bu yaxınlarda QHT Koalisiyası və QHT-lərə Dövlət Dəstəyi Şurasının iclasında qanunvericiliyin liberallaşdırılması və hakimiyyətin QHT-yə qarşı münasibətinin yumşaldılması ilə bağlı konkret təkliflər irəli sürülüb. 

İctimaiyyət bu sahədə qanunverici dəyişikliklər gözləyir, lakin hələlik hakimiyyət bunları yalnız sərtləşdirir. Belə ki, fevralın 15-də parlament “Qrantlar haqqında”, “Dini etiqad azadlığı haqqında” və “Qeyri-hökumət təşkilatları (ictimai birliklər və fondlar) haqqında” qanunlara QHT-lərin fəaliyyətini məhdudlaşdıran və sərtləşdirən düzəlişləri qəbul edib. --17D—