A.Ağacanov: Qarabağ xristianlarının və azərbaycanlıların kökləri eynidir

Qarabağ münaqişənin kökləri region tarixi haqqında erməni elminin saxtalaşdırılmasına söykənir. Dağlıq Qarabağda separatizm ideyası məhz bu yalan tarixə əsaslanıb və bunun əsl məqsədi regionun tarixən bağlı olduğu Azərbaycandan ayrılması olub. Bu barədə martın 14-də Bakıda "Qafqaz Tarixi Mərkəzi" ictimai təşkilatının təşkil etdiyi beynəlxalq elmi konfransın iştirakçılarının çıxışlarında deyilib. Konfransın işində Azərbaycan, Gürcüstan, Rusiya, Türkiyə, Qazaxıstan, Kanada, Ukrayna, İsveç, və Özbəkistandan 40-dan çox alim, siyasətçi və ictimai xadim, o cümlədən erməni xadimlər və tədqiqatçılar iştirak edirlər.

Mərkəzin rəhbəri Rizvan Hüseynov bildirib ki, görüşün məqsədi münaqişənin sülh yolu ilə həlli yollarının müzakirəsidir. O xatırladıb ki, ötən ilin sonlarında Azərbaycan və Ermənistan vətəndaş cəmiyyəti fəalları tərəfindən "Ermənistan və Azərbaycan arasında Sülh Platforması" yaradılıb və hazırki konfrans bu sülhməramlı missiyanın genişləndirilməsi, müxtəlif ölkələrin politoloji və elmi dairələrinin cəlb olunması məqsədilə keçirilir.

Azərbaycan Prezident Administrasiyasının sektor müavini Fuad Axundov qeyd edib ki, erməni xalqı tarixinin saxtalaşdırılmasının qurbanı olub. Başqa xalqlara qarşı düşmənçilik salınması da məhz erməni tarixşünaslığında saxtalaşdırmalara əsaslanır və Qarabağ müharibəsinin başlamasının da səbəbi bu olub. 25 ildir erməni siyasətçiləri öz xalqlarını aldadılar ki, Dağlıq Qarabağın müstəqilliyinin tanınmasına az qalıb, amma Yerevan belə bunu edə bilmir. Bu siyasətin nəticəsində Ermənistan inkişaf fürsətlərini əldən verir.

Məşhur Rusiya eksperti Maksim Şevçenko qeyd edib ki, Cənubi Qafqaz tarix boyunca üç imperiyanın: Rusiya, Osmanlı və Fars imperiyalarının qarşıdurma yeri olub. Bu gün Rusiya, Türkiyə və İran regionu öz maraqlar regionu hesab etməyə iddia edir. Avropa İttifaqının da regionla bağlı öz iddiaları var. "Amma regionun hər hansı qüvvə mərkəzinin nəzarəti altına düşməsi qeyri-mümkündür. Çünki belə ssenarilərin həyata keçirilməsi cəhdləri yeni münaqişələrə aparıb çıxaracaq", ekspert belə hesab edir.

Şevçenkonun fikrincə, müharibə dövlətlərin iqtisadi inkişafı təmin etmək iqtidarında olmaması ilə əlaqədar baş verir, baxmayaraq ki, bu, hər cür ideoloji əsaslandırmalarla ört-basdır edilir.

Azərbaycan inkişafa investisiya edir, böyük beynəlxalq tədbirlər keçirir, sülhə hazır olduğunu nümayiş etdirir. Ermənistanda hakim partiya hakimiyyəti əlində saxlamaq üçün parlament seçkilərində yaxın keçmişə qədər rəsmi olaraq terrorçuluğu siyasi mübarizəsinin prinsipi hesab edən Daşnaksütun Partiyası ilə ittifaq qurur. "Bu alyans qalib gələrsə, müharibə Ermənistanın siyasi kursunun əsasına qoyulacaq", deyə Şevçenko qeyd edib.

"Münaqişənin nizamlanması təkcə Dağlıq Qarabağın və digər rayonların işğaldan azad edilməsini deyil, qarşılıqlı olaraq məcburi köçkünlərin qaytarılması üçün imkan yaradılmasını əhatə etməlidir", deyə Şevçenko qeyd edib. Bununla belə, o vurğulayıb ki, münaqişə hərbi yolla həll oluna bilməz. Gərginlik Gürcüstan, Rusiya və NATO ölkələri ərazisində münaqişəyə səbəb olacaq. Ermənistan Rusiyadan dəhliz tələb edəcək, Gürcüstan isə NATO-ya müraciət edəcək. Rusiya regionda öz maraqlarını qorumaq üçün addımlar atacaq. Azərbaycan üçün bu, Rusiya və İran arasında qalmaq və Rusiyadakı aktivlərini və siyasi nüfuzunu zərbə altına qoymaq deməkdir.

"Alban Avtokefal kilsəsinin və türk-xristian irsinin bərpası uğrunda hərəkat"ın sədri, əslən Dağlıq Qarabağdan olan Artur Ağacanov bildirib ki, regionun tarixi erməni tarixşünaslığında saxtalaşdırılıb.

Onun sözlərinə görə, Qarabağ erməniləri qədim albanların və türklərin varisləridir. Qarabağ xristianlarının və azərbaycanlıların eyni soyadları da buradan gəlir - Ağacanov, Allahverdiyev, Bağırov və s.

Ağacanovun fikrincə, Qarabağ erməniləri haqqında danışarkən "Qarabağ xristianları" adından istifadə etmək daha doğru olardı.

Əslində, azərbaycanlılar və Qarabağ xristianları eyni nəsildəndir.

Region tarix boyunca müharibə və hücumlar meydanı olub, bu, dini-etnik mənzərədə iz qoyub. Qarabağ xristianlarının dili erməni dilindən çox fərqlənir.

"Bir çox qarabağlılar qəlbən mənimlə razılaşırlar. Amma bunu açıq deməyə çox az insan cürət edir", deyə ekspert bildirib.

Onun sözlərinə görə, Qarabağ xristianları bioloji cəhətdən ermənilərdən daha çox Azərbaycanlılara yaxındırlar. Keçmişdə Qarabağ xristianlarının nəsilləri də azərbaycanlılar kimi zərdüştlüyə itaət edirdilər.

Qarabağ xristianlarının "erməniləşməsi" prosesinə Erməni kilsəsinin Çar Rusiyasında Alban kilsəsinin ləğvinə nail olmağa müvəffəq olması da çox böyük təsir göstərib, deyə o qeyd edib.

Konfrans davam edir.  –06C--