Aİ-nin "Doğru bacarıqlar qazan" kampaniyası çərçivəsində seminar keçirilib

Avropa İttifaqının Azərbaycandakı nümayəndəliyi iyunun 13-də "Doğru bacarıqlar qazan" kampaniyası çərçivəsində sonuncu - onuncu seminarı keçirib.

Layihənin məqsədi gələcəkdə əmək bazarında tələbat olacaq ixtisaslara gənclərin diqqətini artırmaqdan ibarətdir.

Seminarda "yaşıl enerji" sahəsində bilikləri ilə fərqlənən motivatorlar - tələbə Emin Xəlifəyev və robototexnik Mahmud Vəlili iştirak ediblər.

"Aİ tərəfindən maliyyələşdirilən müxtəlif proqramlar Azərbaycan gəncləri üçün geniş təhsil və peşəkar inkişaf imkanları yaradır", deyə Aİ-nin Azərbaycandakı nümayəndə heyətinin rəhbəri, səfir Peter Mixalko bildirib.

Gənclər "Erazmus+" tələbə proqramından, həmçinin peşə təhsili sahəsində proqramdan faydalana və bu proqramlar çərçivəsində öz potensiallarını həyata keçirə bilərlər.

Hazırkı kampaniya gələcəkdə nüfuzlu və yüksək maaşlı iş əldə etmək məqsədilə həyata keçirilir.

Aİ ali təhsil, peşə təhsili, mədəniyyət, səhiyyə və digər sahələrdə Azərbaycanın uzunmüddətli və strateji tərəfdaşıdır. Aİ-nin dəstəyi ilə bir çox Azərbaycan vətəndaşları biznes qurub, kənd təsərrüfatı istehsalına başlayıb, digər sahələrdə yeni bacarıqlar əldə edib.