AİHM 2010-cu il parlament seçkiləri ilə bağlı şikayətlər üzrə Azərbaycan hakimiyyəti ilə kommunikasiyaya başlayıb
Avropa İnsan Hüquqları Məhkəməsi (AİHM) 2010-cu il parlament seçkiləri ilə bağlı iki şikayət üzrə Azərbaycan hakimiyyəti ilə kommunikasiyaya başlayıb.
Söhbət iki müxalifətçi – Nurəddin Məmmədli və Dünyaxanım Cərullayevanın şikayətindən gedir. Bu barədə Turan-a AİHM-də iddiaçıların maraqlarını təmsil edən Hüquqi Maarifləndirmə Cəmiyyətinin sədri İntiqam Əliyev bildirib. Onun sözlərinə görə, hökumətə AİHM-in suallarını cavablandırmaq üçün sentyabrın 25-nə qədər vaxt verilib.
Məmmədli 2010-cu il seçkilərində 18-ci Nərimanov-Nizami seçki dairəsindən namizəd olub. O, namizədliyinin qeydiyyatı üçün 599 imza olan 12 imza vərəqəsini dairə seçki komissiyasına (DSK) təqdim edib. Məmmədli öz ərizəsində qeyd edib ki, DSK sədri və komissiya üzvləri namizədliyini geri alması üçün ona pul təklif ediblər. Lakin o, təklifi qəbul etməyib və 12 oktyabr 2010-cu ildə DSK onu qeydiyyata almaqdan imtina edib. Buna tələb olunan 450 imza yerinə guya cəmi 411 etibarlı imza olması bəhanə olub. Məmmədlinin MSK-ya, Bakı Apellyasiya Məhkəməsinə və Ali Məhkəməyə şikayətləri təmin edilməyib.
Cərullayeva 86-cı İsmayıllı seçki dairəsindən namizəd olub. Onun da kifayət qədər etibarlı imza olmaması bəhanəsi ilə qeydiyyatından imtina olunub.
Əliyevin sözlərinə görə, 2010-cu il seçkiləri ilə bağlı AİHM-yə 120 şikayət göndərilib. “2005-ci il parlament seçkiləri ilə bağlı şikayətlərdə olduğu kimi, iddiaçılar seçkilərin total şəkildə saxtalaşdırıldığını, hakimiyyət orqanlarının seçki prosesinə qanunsuz müdaxilə etdiyini, dövlət resurslarından hakimiyyətin namizədlərinin xeyrinə istifadə olunduğunu, siyasi ayrı-seçkiliyi, şikayətlərə ədalətsiz baxıldığını və s. qeyd edirlər. Güman edirəm ki, hakimiyyətin AİHM-in qoyduğu sualları dəlilli şəkildə cavablandırması asan olmayacaq”, deyə Əliyev bildirib.
O xatırladıb ki, 2005-ci il seçkiləri üzrə AİHM-yə 40-a yaxın şikayət göndərilib. Onlardan 11-nə mahiyyəti üzrə baxılıb və təmin edilib. bu, Mirəziz Seyidzadə (din xadimi), Nemət Əliyev (AXCP fəalı), Flora Kərimova (müğənni), Əli Kərimli (AXCP lideri), Arif Hacılı (“Müsavat” partiyasının aparat rəhbəri), Qulamhüseyn Əlibəyli (“Aydınlar” partiyasının sədri), Sərdar Cəlaloğlu (Demokrat Partiyasının lideri), Bəybala Əbil (Klassik Xalq Cəbhəsi Partiyasının fəalı), Xanhüseyn Əliyevin (“Qaya” mətbuat yayımı firması) və Abbas Atakişiyevin (müstəqil hüquqşünas, vəkil) ərizələri üzrə qəbul edilmiş qərarlar idi.
Daha 7 iddiaçının (İsa Qəmbər, Eldar Namazov, Mirmahmud Fəttayev, Fuad Mustafayev və b.) hökumətin barışıq təklifini qəbul etməkdən imtina etməsi ilə əlaqədar onlar baxılan işlər siyahısından çıxarılıb.
2005-ci il seçkiləri üzrə qərar elan edilməmiş bir iş qalır. Bu, AXCP sədr müavini Həsən Kərimovun iddiasıdır. Bu iş üzrə yaxın gələcəkdə qərar elan ediləcək, deyə hüquqşünas Əliyev bildirib. -06D-
Rəy yaz