AİHM Nardaranlıların şikayətləri ilə bağlı kommunikasiyaya başlayıb

Bakı/02.05.18/Turan: Avropa İnsan Hüquqları Məhkəməsi (AİHM) 2015-ci il Nardaran hadisələri ilə əlaqədar həbs edilənlərin işi üzrə kommunikasiyaya başlayıb.

Söhbət "Müsəlman Birliyi" hərəkatının lideri Taleh Bağırzadənin və onunla birlikdə həbs edilmiş Zakir Mustafayev, Abbas Hüseynov, Şamil Abdullayev, Əlibala Vəliyev, Rasim Cəbrayılov, Ramin Yarıyev, Abbas Quliyev və Əli Nuriyevin şikayətlərindən gedir.

Şikayət ərizəçilərin DİN-in Mütəşəkkil Cinayətkarlığa qarşı Mübarizə Baş İdarəsində məruz qaldıqları işgəncələrlə bağlı verilib. Yerli məhkəmələr onların işgəncə ilə bağlı şikayətlərini təmin etməyib.

Ərizəçilər Avropa İnsan Hüquqları Konvensiyasının 3-cü (işgəncələrin qadağan edilməsi), 13-cü (səmərəli hüquqi müdafiə vasitələrindən faydalanmaq hüququ) və 6-cı (ədalətli məhkəmə təhqiqatı hüququ) maddələrinin pozulduğunu iddia edirlər.

AİHM Azərbaycan hökumətinə suallar göndərib, hakimiyyət üç ay ərzində onları cavablandırmalıdır.

AİHM həmçinin jurnalistlər Fikrət İbişbəyli (Fərəməzoğlu) və Elçin Həsənovun, hüquqşünas Aslan İsmayılovun, fəal Bəxtiyar Hacıyevin işləri üzrə kommunikasiyaya başlayıb.

Onlar Avropa Konvensiyasının 10-cu (ifadə azadlığı) və 34-cü (fərdi şikayət hüququ) maddələrinin pozulmasının tanınmasını xahiş edirlər. -16D06-