Almaniya Azərbaycan və Ermənistanı “sülh sazişinə gedən yolun  son kəsiyini keçməyə” çağırır

Almaniyanın Azərbaycandakı səfirliyi bu ölkənin milli bayramı  - Alman Birliyi Günü münasibətilə təntənəli ziyafət təşkil edib. oktyabrın 3-də Almaniya Federativ Respublikasında ölkənin sülh yoluyla birləşməsinin 34-cü ildönümünü qeyd olunur.

“Almaniyanın birləşməsi “soyuq müharibə”nin sona çatması ilə baş tutdu və eyni zamanda azad və vahid Avropanın təməl daşına çevrildi. Almanlar bu yolda bizə dəstək olan qonşularına, müttəfiqlərinə və dostlarına həmişə minnətdar olacaqlar. Biz isə Almaniya və Avropa birliyinin əsasını təşkil edən prinsipləri və dəyərləri hər zaman qətiyyətlə müdafiə edəcəyik: azadlıq, sülh, ədalət və demokratiya”, - səfir Ralf Horleman toplaşanları salamlayarkən deyib.

O qeyd edib ki, son bir ildə Almaniya və Azərbaycan bir çox sahələrdə intensiv şəkildə əməkdaşlıq ediblər və hər iki istiqamətdə çoxlu səfərlər, o cümlədən prezident İlham Əliyevin Almaniyaya iki səfəri və Almaniyanın xarici işlər naziri Annalena Berbokun Bakıya səfəri həyata keçirilib. Bakı və Berlin arasında dialoq sıx, əsaslı və konstruktiv olub, qarşılıqlı hörmətlə səciyyələnir.

“Əməkdaşlığın əsas məsələlərindən biri, əlbəttə ki, hələ də gündəmdə duran COP29 olub. İqlim danışıqları prosesində aparıcı ölkə kimi Almaniya Azərbaycanı COP-un gələcək sədri kimi ilk gündən dəstəkləyir. Çünki biz burada yalnız bir ölkə üçün deyil, planetimiz üçün açılan imkanlar görürük və mən Azərbaycan hökumətini bu ən mühüm konfransın hazırlanmasında və onun uğurla keçirilməsində indiyədək gördüyü mükəmməl işlərə görə təqdir etmək istəyirəm”, - Horleman vurğulayıb.

Almaniya COP29-un müvəffəqiyyətli olmasında maraqlıdır və elektromobillik daxil olmaqla, bərpa olunan və davamlı gələcəyə enerji keçidini fəal şəkildə təşviq edir. 2030-cu ilə qədər enerji keçidi bütün dünyada 30-50 milyon yeni iş yeri yarada bilər.

“İlk gündən COP29 Azərbaycan və Ermənistan arasında sülh prosesi ilə sıx bağlı idi. COP29-un Cənubi Qafqazda sülhün bərqərar olmasına da kömək edəcəyinə böyük ümidlər bəsləyirik. İki ölkə heç vaxt sülh sazişinə bu qədər yaxın olmamışdır. Hər iki tərəf sülhə doğru cəsarətli addımlar atmışdır və biz onları sülh sazişinə doğru gedən yolun ən son və həmçinin ən çətin olan kəsiyini keçməyə təşviq edirik. Almaniya bu prosesi dəstəkləməyə hazırdır”, - səfir deyib.

“Almaniya Avropa İttifaqının üzvü kimi, Azərbaycanla münasibətlərini dərinləşdirməyə və möhkəmləndirməyə səy göstərəcək. Bu il ərzində biz bir çox məsələləri müzakirə etdik və gələcəkdə də bu yolu davam etdirməyi səbirsizliklə gözləyirik”, - almaniyalı diplomat qeyd edib.

Azərbaycan hökumətinin adından çıxış edən Xarici İşlər Nazirliyinin Avropa İşləri İdarəsinin rəisi Məmməd əhmədzadə ikitərəfli əlaqələrin uğurla inkişaf etdiyini bildirib.

Onun sözlərinə görə, Almaniya Avropa İttifaqı  ölkələri arasında Azərbaycanın ikinci ən böyük ticarət tərəfdaşıdır. Ötən il qarşılıqlı ticarətin həcmi 1,8 milyard ABŞ dollarına çatıb. Bu ilin ilk səkkiz ayında isə ticarət dövriyyəsi 980 milyon ABŞ dolları təşkil edib.

O, Azərbaycanda çox sayda alman şirkətinin fəaliyyət göstərdiyini  qeyd edib.

İqtisadi əməkdaşlığın inkişafında Ticarət və İnvestisiyalar üzrə Azərbaycan-Almaniya Yüksək Səviyyəli İşçi Qrupu mühüm rol oynayır.

Bu il Almaniya Şərqi Biznes Assosiasiyasının Azərbaycana missiyası yeni əməkdaşlıq imkanlarının öyrənilməsi üçün faydalı olub, Məmməd Əhmədzadə sözlərinə davam edib.

O həmçinin Almaniya tərəfinin COP29 konfransına hazırlıqda fəal iştirakını ikitərəfli əməkdaşlıq nümunələrindən biri adlandırıb.