Amerikalı analitik: �Qarabağ münaqişəsində yeganə qalib Rusiyadır�

Vaşinqton/20.11.17/Turan: Putin Rusiyası Qarabağ münaqişəsinin hər hansı "qələbəli" həll variantında maraqlı deyil. Əksinə, Moskva münaqişəni saxlamaqla qarşıdurmanın saxlanmasında və tərəflərin zəifləməsində maraqlıdır, amerikalı analitik Ceyms Koyl özünün "Rusiyanın sərhəd müharibələri və dondurulmuş münaqişələr" kitabında belə qənaətə gəlir.

Ötən həftə Vaşinqtonda auditoriya qarşısında çıxış edən Koyl deyib ki, Rusiyanın digər ölkələrin (xüsusilə də periferiyada) daxili işlərinə müdaxilə etməklə bağlı uzun tarixi var.

Moskvanın xarici siyasətini öyrənərkən Kremlin separatçı hərəkatları tez-tez silahlandırmaqla, ya da onların adından mübarizə aparmaqla separatçı hərəkatları təşviq etdiyini sezmək çətin deyil.

"Dağlıq Qarabağ münaqişəsində yeganə açıq-aşkar qalib Rusiya oldu ki, silah satışından faydalandı", - Koyl Atlantik Şurasındakı çıxışı zamanı deyib, Turan-ın müxbiri xəbər verib.

Ermənistanın Cənubi Qafqazda prioritet olduğunu nümayiş etdirən Moskva eyni zamanda Azərbaycan üçün də əsas silah təchizatçısı olmaqda davam edir.

2010-cu il Rusiya-Ermənistan hərbi razılaşması ilə Gümrüdəki hərbi bazanın 2044-cü ilədək qalmasının uzadılmasına baxmayaraq, Moskva Azərbaycana S-300 HHM sisteminin satışı ilə bağlı danışıqlar aparıb.

2013-ci ilin iyununda Rusiya Bakıya 1 milyard dollar dəyərində silah göndərib və nəticədə silah satışının ümumi dəyəri 2010-cu ildən 3-4 milyard dollara çatıb.
Minsk sülh prosesi və ya hər hansı bir ölkə, ya təşkilat sülhün əldə olunmasına nail olmayıb.

"Minsk prosesi özü dalana dirənmiş vəziyyətdə qalır". Xüsusilə, bu dalan Azərbaycanı zəif və bölünmüş bir vəziyyətdə saxlayır, Rusiya isə diplomatik müttəfiqi - Ermənistanı əldə etməklə bu fonda güclənir. Bu da Rusiyaya Ermənistanda öz hərbi iştirakını genişləndirməyə imkan verir" , - ekspert hesab edir.

Koyl Atlantik Şurasının baş elmi əməkdaşıdır. Onun "Rusiyanın sərhəd müharibələri və dondurulmuş münaqişələr" kitabında Moldova, Gürcüstan, Ukrayna və Azərbaycanda Rusiya siyasətinin kökləri araşdırılır.
Onun fikrincə, bu dörd tematik araşdırmada mahiyyətcə oxşarlıq var: Rusiyanın separatçı azlıq hərəkatlarına dəstəyi, Rusiyanın sülhməramlı kimi müdaxiləsi, münaqişələrin həllinin qarşısının alınması üçün Rusiyanın diplomatik prosesə nəzarəti və bu bölgədə Rusiyanın mövcudluğunun əbədiləşdirilməsi.

Bundan öncə Koyl ABŞ hökumətində müxtəlif vəzifələr tutub. -0-