Aslan İsmayılovun vəkillik fəaliyəti dayandırılıb

Azərbaycan Vəkillər Kollegiyası mayın 8-də vəkil Aslan İsmayılovun vəkillik fəaliyyətinin dərhal dayandırılması və vəkillikdən xaric edilməsi üçün məhkəməyə müraciət edilməsi barədə qərara qəbul edib. Kollegiya həmçinin İsmayılovun “Aslan İsmayılov və partnyorları” Vəkil Bürosunun bağlanması barədə qərar qəbul edib. Bu barədə Aslan İsmayılov özü Turan-a bildirib. 

İsmayılovun sözlərinə görə, kollegiya Səbail rayon məhkəməsinin hakimi Elnur Həsənovun şikayəti əsasında ona qarşı qərar qəbul edib. “Bu il fevralın 10-da mən Elnur Həsənovun hərəkətlərindən ədliyyə nazirinə şikayət etmişəm. İki gün sonra, fevralın 12-də isə o, Vəkillər Kollegiyasına şikayət edib. Onun şikayətinə baxılıb, mənim şikayətimə isə cavab verən yoxdur”, deyə vəkil bildirib. 

Hakim yazıb ki, İsmayılov otağına daxil olaraq onu təhqir edib. “Halbuki, Elnur Həsənovun otağının qapısı onun özünün əlinin altında olan düymə ilə açılır. Hakim özü düyməni basmasa, otağa daxil olmaq qeyri-mümkündür. Bununla yanaşı, hakim şikayət verəndən sontra həmin düyməni və kilidi sökdürüb”, deyə o qeyd edib. 

Aslan İsmayılov Vəkillər Kollegiyasının qərarını sifariş hesab edir. “Bunlar artıq başlarını itiriblər, Kollegiyanın qərarı ictimai fəaliyyətimlə bağlıdır və mənim susdurulmağıma yönəlib. Amma məni susdura bilməyəcəklər”, deyə vəkil bəyan edib. 

O, sifarişin “ən azı Prezident Administrasiyasının rəhbəri Ramiz Mehdiyev tərəfindən verildiyini” iddia edir. -03B-