AŞPA-nın Ukrayna üzrə qətnaməsində Krımın qəsb edildiyi bildirilir

Avropa Şurası Parlament Assambleyası (AŞPA) Krım yarımadasının Rusiyaya birləşdirilməsini pisləyib, regiondakı rusdilli əhalinin sıxışdırılması ilə bağlı Rusiya tərəfinin arqumentlərinin həqiqətəuyğun olmadığını bildirib.

Həmçinin Assambleya Rusiya qoşunlarının Krımdan çıxarılmasını tələb edib və faktiki olaraq Viktor Yanukoviç hakimiyyətini Maydanda snayperlərdən istifadədə ittiham edib.

  "Ukraynadakı son vəziyyət: demokratik təsisatların fəaliyyətinə təhlükə" adlı sənəddə Assambleya Ukraynada formalaşan mövcud hakimiyyəti legitim hesab edir, ölkənin Krım bölgəsinin işğalının özəyindəki hadisələrə və səbəblərə Rusiya tərəfindən təhrik edilməsi,  Ukraynada başlamış “Maydan” hərəkatının nəticəsi kimi Krım bölgəsinin, eləcə də ölkənin ruslar yaşayan digər bölgələrinin Ukraynadan ayrılmasının və ya başqa bir ölkəyə birləşdirilməsinin qəbuledilməz olduğu bildirilir.

Sənəd 154 səs “lehinə”, 29 “əleyhinə” olmaqla qəbul edilib. 

  Sənəddə Ukraynanın müstəqilliyi, suverenliyi və ərazi bütövlüyü dəstəklənir və Krımda keçirilən referendum və onun ərazisinin Rusiya tərəfindən aneksiyasının hüquqi qüvvəsinin olmadığı və Avropa Şurası tərəfindən tanınmadığı vurğulanır.

Həmçinin deputatlar Ukrayna ilə bağlı digər problemlərə, “Maydan”da snayperlərin hərəkətinə toxunublar. Assambleyanın fikrincə, onları Viktor Yanukoviç hakimiyyəti cəlb edib. 

AŞPA fevralın 21-də Yanukoviçlə müxalifət arasında razılaşmanın pozulması barədə ittihamı rədd edib.

“Ali Rada bu münaqişənin həllində mühüm və konsturktiv rol oynayıb, təmkin və anlayış göstərib, hakimiyyət dəyişikliyi ilə bağlı çətin məqamın öhdəsindən gələ bilib, 21 fevral 2014-cü il razılaşmasının əsas müddəalarına əməl olunmasını təmin edib”, - qətnamədə deyilir.

Qeyd edək ki, Azərbaycan nümayəndə heyəti qətmanənin “lehinə”, Ermənistan isə “əleyhinə” səs verib.-02D-