ATƏT: Azərbaycanda seçkilər əsas azadlıqların məhdudlaşdırılması ilə keçirilib (video)

9 oktyabr prezident seçkiləri vətəndaşların birləşmək, ifadə və toplaşmaq azadlıqlarını həyata keçirməsinə ciddi maneələr şəraitində keçirilib. Bu barədə ATƏT DTİHB və ATƏT PA müşahidə missiyalarının birgə bəyanatında deyilir.

“Ədalətli seçkiqabağı mühit olmayıb. Səsvermə günü seçkilər prosesinə müdaxilələr olub”, deyə ATƏT-in hazırki sədrinin xüsusi əlaqələndiricisi Mişel Vuazen bildirib.

ATƏT PA və DTİHB-dən 350-yə yaxın müşahidəçi 1143 seçki məntəqəsində, yəni bütün məntəqələrin dörddə birindən çoxunda seçkiləri müşahidə edib.

Səsvermə günü Azərbaycanın ATƏT qarşısında demokratik seçkilərin keçirilməsi sahəsində öhdəliklərinə riayət etməsində ciddi nöqsanlara dəlalət edən problemlər qeydə alınıb, deyə o qeyd edib.

Eyni zamanda, o, bir sıra müsbət məqamları qeyd edib: seçkilərdə 10 namizəd iştirak edib ki, bu, plüralizmdən xəbər verir. MSK yaxşı hazırlaşıb və seçkiləri yaxşı təşkil edib. Həm adi vətəndaşlardan, həm də partiya nümayəndələrindən çox sayda müşahidəçi olub.

Səsvermədə seçicilərin 72%-i iştirak edib ki, bu da seçkilərdə iştirakla bağlı Avropa göstəriciləri ilə müqayisə oluna bilər.

Problemlərə gəlincə, namizədlərin mediaya çıxışı məhdudlaşdırılıb ki, bu, ədalətli seçkiqabağı mühit üçün maneələrdən biri olub.

Müşahidəçilər məntəqələrin 58%-də səslərin hesablanmasında problemlər olduğunu qeyd ediblər. Məntəqələrin 11%-də səsvermə prosesində ciddi pozuntular qeydə alınıb.

ATƏT PA nümayəndəsi Doris Barnett Bakı və Sumqayıtda 7 məntəqədə müşahidə aparıb və namizədlərin mediaya çıxışının məhdudlaşdırıldığını və kifayət qədər debatlar olmadığını qeyd edib. Bundan başqa, hər bir siyasətçinin və fəalın toplaşmaq, ifadə azadlığından və digər azadlıqlardan istifadə etməsi vacibdir. O, hakimiyyəti sözügedən sahələrdə problemləri mümkün qədər tez həll etməyə çağırıb.

ATƏT DTİHB missiyasının rəhbəri Tana de Zuleta qeyd edib ki, seçkilər sadəcə səsvermə günündən ibarət deyil, buna görə müşahidə missiyası 6 ay ərzində qanunvericiliyin və seçkiqabağı təşviqatın qiymətləndirilməsi üçün kampaniyanın monitorinqini aparıb.

Missiya müşahidəçiləri məntəqələrin 19%-də səsvermənin başlanğıcı prosesini pis və ya çox pis qiymətləndiriblər. Səsvermə başa çatdıqdan sonra səslərin hesablanması zamanı baş verənlər xüsusilə ciddi narahatlıq doğurub. Belə ki, seçki məntəqələrinin 58%-də səslərin hesablanması pis və ya çox pis səviyyədə aparılıb, deyə o qeyd edib.

Təşviqat kampaniyasının 22 günə qədər azaldılması namizədlərin seçicilərə öz platformaları haqqında məlumatlandırmaq imkanını məhdudlaşdırıb. Digər bir məhdudiyyət mitinqlər və görüşlər üçün qapalı məkanlarda cəmi 152 yer ayrılması olub.

ATƏT DTİHB və ATƏT PA-nın bəyanatının Avropa Parlamenti və AŞPA-nın qiymətləndirmələrindən kəskin şəkildə fərqlənməsinin səbəbi haqqında suala cavabda Vuazen bildirib ki, AP və AŞPA missiyaları kiçik olub və qısamüddətli monitorinq aparıb, ATƏT DTİHB isə uzunmüddətli əsaslarla monitorinq aparıb və bütün ölkəni əhatə edib.

Daha sonra hakimiyyətyönlü jurnalistlərin yerlərindən ATƏT nümayəndələrini qərəzlilikdə ittiham edən ifadələr səsləndirdikdə mətbuat konfransında qalmaqal yaranıb. Sual vermək yerinə onlar missiya üzvlərini ittiham edərək, onları susdurmağa başlayıblar.

Öz növbəsində, Zuletta fundamental azadlıqların məhdudlaşdırılması, namizədlərin və seçicilərin qorxudulmasının ciddi pozuntular olduğunu və Azərbaycanın ATƏT qarşısındakı öhdəliklərini yerinə yetirməməsi demək olduğunu vurğulamağa müvəffəq olub.

Bu sözlər yenidən hökumətyönlü jurnalistlərin qəzəbinə səbəb olub, onlar qışqırmağa başlayıblar və  mətbuat konfransını pozublar. -06C-