Azərbaycan �Şərq Tərəfdaşlığı� sammitinin Bəyannaməsinin qəbuluna mane olacaq?

Brüssel/24.11.17/Turan: Azərbaycan Şərq Tərəfdaşlığı sammitinin bu gün imzalanması nəzərdə tutulan Yekun Bəyannaməsinin qəbuluna mane ola bilər.

"Azadlıq Radiosu"nun məlumatına görə, Yerevan və Bakı Qarabağ münaqişəsi ilə bağlı ifadələr barədə razılıq əldə edə bilməyiblər, baxmayaraq ki, sənədin bütün qalan mətni razılaşdırılıb.

Regional münaqişələrlə bağlı bir abzas razılaşdırılmayıb. Sammit təşkilatçıları bəyannamənin qəbulunun baş tutmayacağı təhlükəsinin olduğunu düşünürlər.

"Avropa İttifaqının ciddi narahatlıqları var, belə ki, burada 2015-ci il sammitində bu məsələ ilə bağlı mübahisənin başdan sona qədər davam etdiyini yaxşı xatırlayırlar. Hətta Əliyev Yekun Bəyannaməni imzalamamağı əmr etmişdi, nəticədə sənədin qəbulu bir neçə saat təxirə salınmışdı. Bu məsələ yenə drama çevrilə bilər, bəlkə də Sarkisyan və Əliyev Qarabağ münaqişəsi ilə bağlı ifadələrə və ya onların olmamasına görə sənədi imzalamaqdan imtina edəcəklər", deyə "Azadlıq Radiosu"nun müxbiri Brüsseldən xəbər verir.

Avropalı diplomatlar anonim qalmaq şərtilə bildiriblər ki, bu dəfə Brüssel mövcud münaqişələri adbaad göstərməməyi və ümumi ifadə ilə kifayətlənməyi qərara alıb.

"Azadlıq Radiosu"nun əlinə keçən bəyannamənin ilkin variantı konkret ad göstərmədən, münaqişələrin beynəlxalq hüquq norma və prinsipləri əsasında sülh yolu ilə həlli üzrə səyləri fəallaşdırmağa çağırır.

Qeyri-rəsmi məlumatlara görə, Bakı bəyannaməyə ərazi bütövlüyü prinsipinin daxil edilməsində israr edirdi, Yerevan isə buna etiraz edib. -02D-