Azərbaycan Talışları İctimai Şurası (ATİŞ) təsis edilib

Bakı/10.12.19/Turan: Azərbaycanın köklü xalqlarından biri olan talışların bir qrup ictimai fəalı və ziyalısı Azərbaycan Talışları İctimai Şurasını (ATİŞ) təsis edib.

Təsisçilərin bəyanatında qeyd edilir ki, ATİŞ-in təsis edilməsi tarixi zərurətdən meydana gəlib. Azərbaycan hökuməti Avropa Şurasına daxil olarkən Regional və azlıqların dilləri haqqında Avropa Xartiyasına qoşulmaq öhdəliyi götürsə də, indiyədək bu öhdəliyi yerinə yetirməyib. Avropa Şurasının Milli azlıqların hüquqlarının müdafiəsi haqqında Avropa Şurasının Çərçivə Sazişinə talışlara münasibətdə riayət olunmur.

Talış dilinin tədrisi, bu dil üzrə mütəxəsislərin hazırlanması, talış dilində radio və televiziya verlişlərinin təşkili, talış dilində mətbuatın dövlət büdcəsi hesabına maliyyələşməsi ilə bağlı hökumətə olunan müraciətlər cavabsız qalıb.

"Talış ziyalılarının öz ana dillərinin, mədəniyyətlərinin inkişafı, ictimai-siyasi birliklərin yaradılması ilə bağlı təşəbbüsləri qısqanclıqla və qərəzlə qarşılanır, bir çox hallarda isə belə təşəbbüslər təqib və təzyiqlə müşaiyət olunur", deyə bəyanatda bildirilir.

Etnomüxtəliflik assimlyasiyanı deyil, ölkəmizin multikultural zənginliyini, eləcə də xalqlarımızın inteqrasiyasını şərtləndirən başlıca amildir. "Ona görə, Azərbaycan hökumətindən də gözləntilərmiz xalqımıza qarşı sivil münasibətin nümayiş etdirilməsilə bağlıdır. Məhz belə bir situasiyanı formalaşdırmaq üçün ATİŞ Azərbaycan Respublikası Konstitusiyasının 44, 45 və 58-ci maddələrini əsas götürərək, öz fəaliyyətinə başlamasını məmnuniyyətlə ölkə ictimaiyyətinə bəyan edir", deyə müraciətdə bildirilir.

Son zamanlar ölkədə ictimai-siyasi sahədə aparılan islahatlar milli münasibətlər sahəsində də müsbət addımlar atılacağına inam hissi yaradır.

"Ümidvarıq ki, bu addımımız ölkəmizin tərəqqipərvər, demokratik qüvvələri və vətəndaşları tərəfindən dəstəklənəcək. Fəaliyyətimiz Azərbaycanın dünyada müsbət tolerantlıq imicinin və dövlətçilik ənənələrinin güclənməsinə, Azərbaycanda vətəndaş cəmiyyətinin və hüquqi dövlət quruculuğunun sürətlənməsinə xidmət edəcək. Biz - Azərbaycan Respublikasının talış əsilli vətəndaşları olaraq ölkəmiz üçün bu işdə öz xidmətimizi və töhfələrimizi əsirgəməyəcəyik", deyə müraciətin sonunda qeyd edilir.

Müraciəti ATİŞ-in təsisçiləri - Əli Ağayev (Müsavat Partiyasının üzvü), Nəriman Ağazadə (arxeoloq-etnoqraf), Ataxan Əbilov (İnsan Hüquqlarının müdafiəsi üzrə Niderland Hüquqşünaslar Komitəsinin üzvü), Mikayıl Hacıyev (Qarabağ müharibəsi veteranı), Mirfayaz Likməkani (şair), Hİlal Məmmədov (hüquq müdafiəçisi, "Tolışi sədo" qəzetinin redaktoru), Yaşar Nazarov (Xalq Cəbhəsi Partiyasının üzvü), İltifat Rəhimov (Aydınlar Partiyasının üzvü), Mehdibəy Səfərov (Azəri-Talış İctimai Birliyinin sədri) və başqaları imzalayıblar. -06В-