Azərbaycan UNESCO-ya azad edilmiş ərazilərdə monitorinq missiyası ilə bağlı təkliflərini təqdim edəcək

Bakı/08.01.21/Turan: UNESCO-nun Azərbaycanın ünvanına əsassız ittihamları təşkilatın qərəzsizliyini şübhə altına qoyur, bu barədə mədəniyyət naziri Anar Kərimov BMT-nin İnkişaf Proqramının rezident-nümayəndəsi Qulam İshaqzai ilə onlayn formatda keçirdiyi görüşdə bildirib.

Nazir son dövrlərdə UNESCO-nun erməni işğalından azad edilmiş ərazilərə missiya göndərilməsi ilə bağlı təşkilatın anlaşılmaz açıqlamalarının Azərbaycan tərəfində məyusluq yaratdığını bildirib. Çünki UNESCO-ya əvvəlcə azad edilmiş ərazilərdə təhlükəsizlik məsələlərinin həllinin vacibliyi və minatəmizləmə prosesinin davam etdiyi barədə məlumat verilmişdi.

Digər tərəfdən, son 30 ildə işğal altında qalan ərazilərdəki mədəni irsin monitorinqi üçün missiyanın həyata keçirilməsi üçün Azərbaycan UNESCO-ya dəfələrlə müraciətlər ünvanlayıb, lakin təəssüf ki, bu müraciətlər cavabsız qalıb. Bu missiyaya imkan verilməməsinə görə UNESCO tərəfindən Ermənistana bu haqda bir bəyanat belə verilməyib.

Hazırki müzakirələr fonunda UNESCO tərəfindən Azərbaycanı əsassız olaraq günahlandıran açıqlamaların verilməsi təşkilatın qərəzsizliyini və öz nizamnaməsinə uyğun tərəfsiz yanaşmasını kölgə altına salır”, deyə nazir bildirib.

İshaqzai öz növbəsində bildirib ki, UNESCO ilə əlaqə saxlayır və qarşıda duran missiya ilə bağlı Azərbaycan tərəfin mövqeyini aydınlaşdırmağı xahiş edib.

Kərimov qeyd edib ki, Azərbaycan tərəfi həmin ərazilərə monitorinq missiyasının göndərilməsində hamıdan daha çox maraqlıdır, lakin həmin missiyanın ölkənin ərazi bütövlüyü, suverenliyi və sərhəd toxunulmazlığına, eləcə də beynəlxalq hüququn digər prinsiplərinə hörmət çərçivəsində, mənşəyinə və dini xarakterinə heç bir ayrı-seçkilik qoyulmadan bütün abidələrin və mədəniyyət obyektləri üzərində təşkilini dəstəkləyir. 

Azərbaycan tərəfi  missiyanın parametrlərini əhatə edən sənədin layihəsinə dair öz təkliflərini hazırlayıb və bu sənəd çox yaxın zamanda UNESCO Katibliyinə təqdim ediləcək. -05D06