Azərbaycan XİN Moskvaya cavab verdi: ölkəyə kimi buraxacağımıza özümüz qərar veririk

Bakı/07.07.17/Turan: Rusiya XİN-in erməni əsilli Rusiya vətəndaşlarının Azərbaycan ərazisinə girişinin qadağan edilməsinə təkrarən qeyri-diplomatik formada münasibət bildirməsi təəccüb və anlaşılmazlıq doğurur. Bu dostluqdankənar münasibət iki dövlət arasında strateji tərəfdaşlığın mahiyyətinə uyğun deyil. Bu barədə Azərbaycan XİN-in mətbuat xidmətinin bəyanatında deyilir.

Daha sonra bəyanatda qeyd edilir ki, Azərbaycan tərəfi erməni əsilli Rusiya vətəndaşlarının Azərbaycan ərazisinə girişi üçün "əvvəlcədən məlumatlandırma və xəbərdarlı rejimi əsasında" şərait yaradıb.

"İndiyədək Rusiyadan və digər ölkələrdən yüzlərlə erməni əsilli vətəndaşın əvvəlcədən müvafiq xərdarlıq edilməklə Azərbaycan ərazisinə girişi təmin edilib", deyə sənəddə qeyd edilir.

Daha sonra XİN qeyd edir ki, "Azərbaycan milli maraqlarına və təhlükəsizlik maraqlarına əsaslanaraq, xarici vətəndaşların öz ərazisinə buraxılması barədə qərarı özü qəbul edir".

Rusiya tərəfin milliyyətcə erməni olan RF vətəndaşlarının Azərbaycan ərazisinə girişi məsələsinə bu diqqəti ciddi suallar doğurur.

"Rusiya ATƏT-in Minsk Qrupunun həmsədri olan ölkələrdən biridir və biz Rusiyanın üzərinə qoyulmuş məsuliyyətdən irəli gələrək, münaqişənin tezliklə həlli üçün səyləri daha da fəallaşdıracağına və erməni qoşunlarının Azərbaycanın işğal olunmuş ərazilərindən çıxarılacağına ümid edirik.

Bundan sonra vətəndaşların sərbəst giriş-çıxışı üçün imkan yaranacaq. Azərbaycan tərəfin bu mövqeyi dəfələrlə müvafiq formada Rusiya XİN-in diqqətinə çatdırılıb, deyə bəyanatda vurğulanır. -02D-