Azərbaycanda Heydər Əliyevin vəfatının 12-ci ildönümü qeyd olunur

  Bu gün Azərbaycanda 1993-2003-cü illərdə ölkəyə rəhbərlik etmiş Heydər Əliyevin vəfatı günü qeyd olunur.

Prezident İlham Əliyev və rəsmi şəxslər Fəxri Xiyabanda H.Əliyevin memorialı önünə çiçək dəstələri qoyublar.

Matəm tədbirləri ilə əlaqədar Fəxri Xiyabana bitişik bəzi küçələrdə nəqliyyatın hərəkəti dayandırılıb.

H.Əliyevin ABŞ-ın Klivlend şəhərindəki klinikada vəfat etməsi  barədə informasiya 2003-cü il dekabrın 12-də n

Rəsmi məlumata görə, H.Əliyev uzun sürən ağır xəstəlikdən sonra 80 yaşında vəfat edib (12 dekabr 2003-cü il, Bakı vaxtı ilə saat 19:00).  Klivlend klinikasının məlumatında bildirilib ki, H.Əliyev yerli vaxtla saat 10:00-da vəfat edib. Ölümə ürək və böyrək çatışmazlığı səbəb olub. 2003-cü ilin avqustundan bu xəstəliklərlə bağlı müalicə alıb.

Mərhumun cəsədi Azərbaycana dekabrın 14-də gətirilib. H.Əliyevlə vida mərasimi dekabrın 15-də saat 09:00-da Bakıda Respublika Sarayında keçirilib. Dəfn mərasimi həmin gün Fəxri Xiyabanda olub.

Dekabrın 12-də Azərbaycan ərazisində konsert və əyləncəli tədbirlər ləğv edilir.—0-

Heydər Əliyevin tərcümeyi-halı

Heydər Əlirza oğlu Əliyev 1923-cü il mayın 10-da Naxçıvanda fəhlə ailəsində doğulub. Azərbaycan Dövlət Universiteti tarix fakültəsinin məzunudur. 1941-44-cü illərdə Naxçıvan Muxtar Respublikası Nazirlər Kabinetində çalışıb.

1944-cü ildən Naxçıvanda Azərbaycan Dövlət Təhlükəsizliyi Komitəsinin əməkdaşı olub. Sonrakı illərdə o, sıravi əməliyyatçı, əks-kəşfiyyat idarəsinin rəisi, Azərbaycan DTK sədr müavini və sədri vəzifələrində (1967-69-ci illər) çalışıb.

1969-cu ilin iyulunda H.Əliyev Azərbaycan KP MK-nın birinci katibi təyin edilib, 1982-ci ilin sonunadək həmin postda çalışıb. 1982-ci ilin dekabrında SSRİ Nazirlər Soveti sədrinin birinci müavini təyin edilib və 1987-ci ilədək həmin postu saxlayıb. Eyni zamanda Sov.İKP MK Siyasi Büronun üzvü olub.

Yenidənqurma prosesinin başlanması ilə əlaqədar Qorbaçovla və Əliyev arasında narazılıqlar yaranıb. Bu, Əliyevin postdan kənarlaşdırılmasına və pensiyaya çıxmasına gətirib çıxarıb.

1990-cı ildə Moskvadan Azərbaycan qayıdan H.Əliyev sonrakı illərdə hakimiyyət uğrunda mübarizə aparıb. O, Naxçıvana gedərək öz tərəfdarlarını ətrafına toplayaraq regionda hakimiyyəti götürüb. 1991-1993-cü illərdə Naxçıvan Muxtar Respublikası Ali Məclisinin sədri olub.

1993-cü ilin iyununda Əliyev Bakıya gəlib və ölkədəki siyasi böhran zamanı kompromis şəxs kimi Azərbaycan Ali Sovetinin sədri postuna seçilib.

1993 və 1998-ci ilin oktyabrında Heydar Əliyev Azərbaycanın prezidenti olub. O, üçüncü dəfə prezident olmağı planlaşdırırdı. Lakin qəfildən səhhəti kəskin şəkildə pisləşib. Buna səbəb 2003-cü il aprelin 21-də Respublika Sarayında çıxışı zamanı qan təzyiqinin kəskin şəkildə enməsi nəticəsində yıxılması olub. O, yıxılan zamanı yeddi qabırğasının sındırıb, yumşaq toxumalarda güclü zədə alıb. İyulun 8-də Ankaraya 'Gülhanə' hərbi-tibbi akademiyasına yola düşüb. Avqustun 6-da Rusiya FHN-nin təyyarəsində Klivlend klinikasına gedib, orada ürək və böyrək çatışmazlığından müalicə olunub.

Vəfatından əvvəl son 4 ildə H.Əliyev dörd cərrahiyyə əməliyyatı keçirib. 1999-cu ilin aprelində Klivlend klinakasında aortakoronar şuntlama əməliyyatı keçirib. 2001-ci ildə Vaşinqtonda kataraktadan əməliyyat olunub. 2002-ci ilin fevralında Klivlend klinikasında prostat vəzindən, bu ilin fevralında isə qasıq yırtığından əməliyyat olunub.--0--