Dərbənddə Nizami Gəncəvinin abidəsi dördüncü dəfə təhqir edilib

Bakı/21.09.18/Turan: Dağıstanın Dərbənd şəhərində dahi Azərbaycan şairi və mütəfəkkiri Nizami Gəncəvinin abidəsinə qarşı növbəti vandalizm aktı törədilib. Abidənin sağ əlinin bütün barmaqları sındırılıb. Cinayət sentyabrın 20-də baş verib, hadisəni törədənlər hələlik saxlanılmayb.

Əvvəlki vandalizm aktı 2017-ci ilin noyabrında törədilib. Naməlum şəxslər abidənin baş barmağını sındırıb, küknar ağaclarını kökü ilə birlikdə çıxararaq aparmışdılar.

2015-ci il yanvarın 8-də naməlum şəxslər abidəni yandırmaq istəyiblər. Bundan sonra Dağıstanın keçmiş rəhbəri Ramazan Abdullətipovin göstərişi ilə abidə bərpa edilib və ətrafı abadlaşdırılıb.

2013-cü ilin aprelində şairin adını daşıyan parkda onun abidəsinin barmaqları sındırılıb. Abidənin digər yerlərinə ziyan vurulub.

Dərbəndli jurnalist Telman Tahirli bildirib ki, Gəncəvinin abidəsi ilə ansambl təşkil edən "Yeddi gözəl" kompleksində qadın heykəllərin üzərinə qırmızı boya töküblər. O zaman Dərbənd sakinləri rayon administrasiyasının rəhbərliyinə müraciət etmək istəyib, ancaq şəhər rəhbərliyi nümayəndə heyətini dinləməyib.

1992-ci ildə Dərbənddə Nizami Gəncəvi adına parkda şairin abidəsi qoyulub. Nizaminin Moskva, Sankt-Peterburq, Çeboksarı, Daşkənd, Kişinyov, Pekin, Roma, Gəncə, Sumqayıt və Bakıda da abidəsi var. N.Gəncəvinin abidəsinə qarşı vandalizm ancaq Dərbənddə törədilir.

Əbu Mühəmməd İlyas ibn Yusuf (Nizami Gəncəvi) 1141-ci ildə İldegizidlər dövlətinin Gəncə şəhərində (hazırda dövlətin tarixi ərazisinin şimalında Azərbaycan Respublikası yerləşir) anadan olub. N.Gəncəvi 1209-cu ildə orada vəfat edib. Orta əsr Şərqinin əzəmətli şairlərindən biri, Leyli və Məcnun, Xosrov və Şirin, İsgəndərnamə və s. müəllifidir. -0-