Ekspert: “Dövlət medianın azad fəaliyyəti üçün şərait yaratmağa borcludur”

Bakı/13.01.21/Turan: Dövlətin vəzifəsi medianın azad fəaliyyəti üçün şərait yaratmaqdır. Bu fikri Turan-a media hüququ sahəsində ekspert Xalid Ağəliyev Medianın İnkişafı Agentliyinin yaradılmasını şərh edərkən söyləyib.

“Dövlət medianın həyatından tamamilə yox olmalıdır kimi öhdəlik yoxdur. Əksinə, dövlətlərin medianın azad fəaliyyət göstərə bilməsi yönündə öhdəlikləri var. Teleradio tezlikləri hamı üçün eyni ölçüdə əlçatan olmalıdır. Çap mediası rahatlıqla bütün ölkə ərazisində yayıla bilən olmalıdır. Qanunlar medianı, jurnalistləri qorumalıdır. İctimai bilgilərin açıqlanması təmin edilməlidir. Dövlət orqanları mediaya açıq olmalıdır və s. Bütün bunları dövlət etməlidir, ümumi ifadə etsək, medianın azad fəaliyyət göstərə bilməsi üçün əlverişli ortamı formalaşdırmalıdır. Bu mühiti daha effektiv formalaşdırmaq üçün hər hansı qurum yaradılacaqsa və fəaliyyət göstərəcəksə, burada beynəlxalq öhdəliklərlə uyuşmayan bir şey yoxdur. Yaradılan qurumlar, həyata keçirilən siyasətlər medianın azad fəaliyyət gəstərməsinə qarşı olmamalıdır. Onun fəaliyyətini məhdudlaşdırmamalı, nəzarət altında tutulmasına xidmət etməməlidir. Təəssüflər olsun ki, Azərbaycanda indiyə qədərki təcrübədə yaradılan qurumlar, həyata keçirilən siyasətlər medianı cilovlamağa, nəzarət altında tutmağa xidmət edib. Halbuki, belə yanaşma beynəlxalq ölçülərə, mütərəqqi təcrübələrə uyğun deyil”, - o bildirib.

Agentlik hansı xətalara gorə cəza tətbiq edə bilər və əvvəl bu tədbirləri hansı orqan görürdü? Bu sualın cavabında ekspert deyib ki,

yeni qurumun bu istiqamətdəki səalhiyyətləri ilə bağlı müddəalar aydın deyil, yayğındır. Yəqin ki, tədricən təcrübədə cəzalandırmanın məzmunu haqda öyrənə biləcəyik. Ümumiyyətlə, məhkəmə sistemi varkən hansısa quruma niyə görə medianı, jurnalistləri cəzalandırmaq səlahiyyəti verilməlidir? Media, jurnalist hansısa pozuntuya yol verirsə, məhkəmə yolu var. Ümumilikdə medianın xeyrinə olan xeyli qanuni mexanizmlər var ki, 10 illərdir işləmir. Məsələn, informasiya əldə edilməsi qanunu işləmir. İctimai bilgi sahibləri bu qanunvericiliyə əməl etməməyə görə inzibati məsuliyyət daşıyırlar. Ancaq bu müddəalar indiyə qədər bir dəfə də olsun işə düşməyib. Əgər yeni qurum jurnalistə bilgi verməyən, ictimai bilgiləri qapalı tutan dövlət qurumlarını cəzalandıracaqsa, bu, başqa məsələ. Ancaq indiyə qədərki təcrübəmiz bizi istər- istəməz pessimist edir. Bununla belə ümid edək ki, pis təcrübə tarixə qovuşacaq, yeni qurum medianı daha da məhdudlaşdırmaq yox, onun imkanlarını genişləndirmək yönündə çalışacaq.  --0--