Ekspertlər və siyasətçilərin prezidentin dövlət idarəçiliyində səmərəliliyin artırılması haqqında sərəncamı ilə bağlı rəyləri

Bakı/18.03.20/Turan: Martın 17-də prezident İlham Əliyev "Dövlət idarəçiliyində səmərəliliyin artırılması ilə bağlı əlavə tədbirlər haqqında" sərəncam imzalayıb. Sənəd dövlət orqanlarının fəaliyyətinin səmərəliliyinin qiymətləndirilməsi üzrə sistemin hazırlanmasına və tətbiqinə yönəlib.

Prezident Administrasiyasında prezidentin fərmanlarının və sərəncamlarının icrasına elektron nəzarət üzrə yeni informasiya sisteminin yaradılması nəzərdə tutulur.

"REAL" partiyasının sədri İlqar Məmmədovun fikrincə, dövlət idarəçiliyi sisteminin yaxşılaşdırılması üç amildən asılıdır: qanunvericiliyin; məhkəmə-hüquq sisteminin təkmilləşdirilməsi; dövlət qulluqçularının kifayət qədər maddi təminatı.

Məhkəmə-hüquq sistemi Avropa standartlarına uyğun şəkildə işləsə seçkiləri saxtalaşdırmaq və qanunsuz bir şey həyata keçirmək qeyri-mümkün olacaq. Əks halda heç nə dəyişməyəcək.

İctimai nəzarət və azad mətbuat olmadan səmərəli idarəetmə mümkün deyil, deyə Məmmədov əlavə edib.

Müsavat Partiyasının lideri Arif Hacılının fikrincə, dövlət idarəçiliyi sisteminin səmərəliliyini artırmaq üçün ilk növbədə kadr siyasəti dəyişdirilməlidir.

Həmçinin, Konstitusiyaya dəyişikliklər edilməli, real yerli özünüidarə təmin edilməli, hakimiyyət bölgüsü təmin edilməlidir. "Yalnız bundan sonra normal idarəetmə sistemi qurmaq olar. Avtoritar metodlarla, hakimiyyət piramidasınım bir şəxsə tabe edilməsi ilə idarəçiliyin səmərəliliyi artırıla bilməz", deyə Hacılı bildirib.

O, müqayisə üçün KXDR və Cənubi Koreyanı nümunə göstərib. Bu ölkələrin əhalisi bir xalqdır, amma fərqli sistemlərdə yaşayır.

Cənubi Koreya, ərazisinin kiçik olmasına və təbii sərvətlərinin az olmasına baxmayaraq, inkişafına görə böyük təbii sərvətlərə malik olan dünyanın ən böyük dövlətini - Rusiyanı geridə qoyur. Azərbaycan, faktiki olaraq, Rusiyanın dövlət idarəçiliyi sistemi ilə eyni sistem tətbiq edir.

Siyasi fəal Bəxtiyar Hacıyev hesab edir ki, dövlət idarəçiliyinin səmərəliliyini artırmaq üçün çoxsaylı komitələr, komissiyalar və agentliklər yerinə bir çox idarələri ləğv edib az sayda nazirlik, komitə və komissiya saxlamaq lazımdır. Bundan başqa, səriştəli kadrlar işə cəlb olunmalıdır.

Amma hakimiyyət tənqidi baxışlı kadrları özlərindən uzaqlaşdırır, vəzifəyə qohumbazlıq, yerlibazlıq prinsipi ilə təyin edir. Buna görə ölkədə heç nə dəyişmir.

Həmçinin ədalətli məhkəmə sisteminin, azad mətbuatın yaradılması, tənqidi səslərin, insan hüquqlarının boğulmasına son qoyulması, partiya və QHT-lər üçün azad fəaliyyət şəraiti yaradılması vacibdir. Bunsuz istənilən sərəncam, fərman kağız üzərində qalacaq. -06D-