Əli Kərimli: Elçibəyin zəhərlənməsi haqqında iddialar cəfəngiyatdır

Əbülfəz Elçibəyin zəhərlənməsi haqqında iddialar qeyri-ciddidir, bu cəfəngiyatın prokurorluq tərəfindən araşdırılması isə absurddur. Bu barədə Turan agentliyinə Xalq Cəbhəsi Partiyasının sədri Əli Kərimli “Müasir Müsavat” Partiyasının lideri Hafiz Hacıyevin müraciəti əsasında prokurorluqda Elçibəyin zəhərlənməsi haqqında məlumatın araşdırılması üçün cinayət işi açılmasını şərh edərkən bildirib.

“Bu insan (Hacıyev) uzun aylardır İnternetdə və KİV-də boş-boş məlumatlar yayır”, deyə Kərimli Hacıyevin Elçibəyi onun zəhərləməsi haqqında iddialarını şərh edərkən bildirib.

“Bu, iyrənc yalandır. Biz uzun illər Elçibəylə bərabər işləmişik, mən onun birinci müavini olmuşam, sonradan isə partiya sədri vəzifəsində onun davamçısı oldum”, deyə Kərimli qeyd edib.

Elçibəy məşhur beynəlxalq tibb müəssisələrində müayinə olunub və Türkiyənin Gülhane hərbi hospitalında müalicə alıb, onun onkoloji xəstəliyi olduğunu hamı bilirdi, ölümünə də bu xəstəlik səbəb olub.

“Heydər Əliyev də Elçibəyin xəstəliyi barədə xəbəri olduğunu və ona yardım etməyə hazır oludğunu bildirirdi. Yəni, xəstəlik və müalicə prosesi tamamilə şəffaf idi”, deyə Kərimli bildirib.

Buna görə prokurorluğun hərəkətləri qeyri-ciddidir. “Avtoritar rejimlərdə məmurlar hakimiyyət qarşısında xidmətdə öncüllük nümayiş etdirməyə çalışırlar və prokurorluq rəhbərliyi də bu yoldan gedib. Lakin qanunçuluğun keşiyində duran bir orqan üçün bu, yolverilməzdir”, deyə Kərimli qeyd edib.

O hesab edir ki, bu təxribat qarşıda duran 2013-cü il prezident seçkiləri ilə əlaqədar müxalifətə və şəxsən ona qarşı yönəlib. Onun fikrincə, hakimiyyət müxalifəti nüfuzdan salmağa və onun siyasi mübarizə gücünü almağa çalışır. -06B-