Erməni ekspertlər Lavrovun layihəsi və Paşinyan hökumətinin gələcəyi barədə

Bakı/14.05.20/Turan: Aprel ayında Dağlıq Qarabağ münaqişəsinin mərhələli həlli ilə bağlı RF XİN rəhbəri Sergey Lavrovun məlum bəyanatı onu haqlı olaraq Moskvanın təhdid və xəbərdarlığı kimi qiymətləndirən erməni cəmiyyətini hələ də həyəcanlandırır və qorxudur.

Yerevanda bu bəyanatın səbəbi Paşinyanın Kremllə bağlı yanlış siyasəti hesab olunur. Son günlərdəki şərh və təhlillərin böyük hissəsi dəyişən geosiyasi vəziyyətin təhlilindən daha çox Paşinyanın tənqidi ilə bağlıdır.

Belə ki, “Modus Vivendi” Mərkəzinin rəhbəri Ara Papyan Epress.am-a müsahibəsində təşvişlə qeyd edib ki, Lavrov ilk dəfə olaraq BMT Təhlükəsizlik Şurasının qətnamələrinə və ötən ilin aprelində Moskvanın təklif etdiyi mərhələli variantı nəzərdə tutan sənədə istinad edib.

Lavrovun sözlərinə görə, danışıqların əsası “heç nəyin əvəzində ərazi” prinsipidir. Əgər əvvəllər bu, “statusun əvəzində ərazi”, sonra isə “sülh əvəzində ərazi” idisə, indi bu, “heç nəyin əvəzində ərazi” deməkdir. Yəni, Dağlıq Qarabağın Muxtar Vilayəti ətrafındakı əraziləri verirsən, sonra gözləyirsən ki, bundan sonra nə olacaq.

“Lavrov planı”nın özəyini Rusiya sülhməramlı qüvvələrinin İranla sərhəddə yerləşdirilməsi təşkil edir, Papyan hesab edir. O qeyd edib ki, Moskva Vaşinqtonin buna razılığı ilə “danışığa gələ” bilər. O, Paşinyan hökumətini vəziyyəti qeyri-adekvat qiymətləndirdiyinə görə tənqid edib.

Baş nazirin çoxdankı düşməni David Şahnazaryan daha kəskin danışaraq Ermənistan hökumətinin mövqeyini xəyanət adlandırıb. O əmindir ki, mərhələli həll prosesi müzakirə olunur, beş rayon Azərbaycana qaytarılacaq, Qarabağ isə müvəqqəti status alacaq. Bütün bunlar sənəddə təsbit ediləcək, referendumun keçirilməsi isə gələcəyə təxirə salınacaq, o, News.am-a müsahibəsində bildirib.

 O, Paşinyanı ardıcıl olmamaqda, səriştəsizlikdə və yalanda ittiham edib. Şahnazaryan deyib ki, Lavrov da bu gün Ermənistan-Rusiya münasibətlərinin tarixən ən aşağı səviyyədə olduğunu qeyd edib.

“Bu, Ermənistan hakimiyyətinin reallığı cəmiyyətdən gizlətməyə davam edəcəyi təqdirdə Rusiyanın özünün erməni cəmiyyəti ilə danışmağa başlayacağı barədə bir xəbərdarlıq idi. Lavrov öz adından danışmayıb, ATƏT-in Minsk Qrupunun həmsədrləri adından danışıb və həmsədr ölkələrin vahid mövqeyini təmsil edirdi ki, bu da Ermənistan hakimiyyəti üçün həddindən artıq gözlənilməz oldu”,- Şahnazaryan deyib. O əlavə edib ki, Ermənistan beynəlxalq münasibətlərdə də tam məğlubiyyətə uğrayıb. Belə ki, Ermənistana tarixən yaxın olan Fransa Azərbaycanla hərbi-texniki sahədə miqyaslı proqramlar həyata keçirir. O, rəsmi Yerevanın Lavrova cavab verməməsini biabırçılıq adlandırıb.

İqtisadçı Suren Saakyan “Arminfo”a müsahibəsində "qeyri-populyar islahatlar" fonunda Paşinyan komandasının reytinqinin düşdüyünü vurğulayıb. Elektoral proseslərin pul və "avtoritetlər" diktatından azad edilməsi, korrupsiyanın azaldılması, kölgə iqtisadiyyatının aradan qaldırılması kimi nailiyyətlər hələ ki əhalinin dəstəyindən istifadə etməyə imkan verir. Amma məyus vətəndaşların sayı artır.

Qafqaz İnstitutunun rəhbəri Aleksandr İsgəndəryan “İnqilabdan sonrakı Ermənistan: yeni nəsil, köhnə problemlər” adlı məqaləsində hökumətin addımlarını belə proqnozlaşdırır: karantin ləğv edildikdən sonra hökumət məhkəmə sistemində islahatlar aparmaq və məhkəmə və hakimiyyətin digər qollarında köhnə elitaları aradan qaldırmaq üçün hələ də populyar olacaq.

İsgəndəryan hesab edir ki, Paşinyan hökuməti küçələrdən gələn əks-elitanın timsalında yeni müxalifətlə qarşılaşacaq. “Bu, təşkilat deyil, narazılığın birləşdirdiyi mərkəzləşdirilmiş sosial mühitdir”.

Köhnə mənfur məmurların populyar gənclərlə əvəzlənməsi, qanuni seçkilərin keçirilməsi və qanuna əməl etmək cəhdi yetərli deyil, - İsgəndəryan hesab edir.-02B-