Ermənistan Macarıstanla diplomatik münasibətləri dayandırır

Yerevan/01.09.12/Turan-Аrmİnfo: Ermənistan Macarıstanla diplomatik münasibətləri və bütün rəsmi əlaqələri dayandırır. Bu barədə avqustun 31-də Ermənistan prezidenti Serj Sarkisyan ölkədə akkreditə olunmuş diplomatik nümayəndəliklərin təmsilçiləri ilə fövqəladə müşavirədə bildirib. 

Bu zaman Sarkisyan qeyd edib ki, Ermənistan tərəfi bütün tərəfdaşlarından baş verən hadisə ilə bağlı dəqiq və birmənalı addımlar gözləyir.

“Kim bu addımlarla barışsa sabah tarix qarşısında cavab verəcək. Yarımçıq addımlar və boş söhbətlər qəbuledilməzdir. Baş verənlərlə bağlı hərəkətlər əsasında tərəfdaşlarımızın erməni xalqına qarşı münasibətlərini mühakimə edəcəyik. Bu müraciəti bütün dövlət və hökumət başçılarına çatdırmağınızı xahiş edirəm”, deyə prezident bildirib.

Sarkisyan sözlərinə görə, bu əməllər normal insanın ağlına sığmır. Bu zaman o qeyd edib ki, özünü sivil hesab edən heç bir dövlətin belə addım atmaq haqqına sahib deyil və bu ölkə tərəfdaşlarının müvafiq qiymətləndirmələrinə layiqdir. 

Bir müddət əvvəl Serj Sarkisyan Macarıstan hakimiyyətinin Ermənistan ordusunun leytenantını qətlə yetirmiş Azərbaycan zabiti Ramil Səfərovun ölkəsinə təhvil verilməsi ilə əlaqədar BMT-yə üzv ölkələrdə akkreditə olunmuş diplomatik nümayəndəliklərin rəhbərlərinin və respublikada fəaliyyət göstərən beynəlxalq qurumların rəhbərlərinin iştirakı ilə Milli Təhlükəsizlik Nazirliyinin təcili iclasını çağırıb. 

Qeyd edək ki, avqustun 31-də Macarıstanda ömürlük həbs cəzası almış Azərbaycanlı zabit Ramil Səfərov vətənə qaytarılıb. Elə həmin gün Azərbaycan prezidenti İlham Əliyev onun əfv edilməsi haqqında fərman imzalayıb.

19 fevral 2004-cü ildə NATO-nun “Sülh naminə tərəfdaşlıq” proqramı çərçivəsində Budapeştdə ingilis dili kurslarına ezam edilmiş Ermənistan ordusunun leytenantı Qurgen Marqaryan kurs iştirakçısı Ramil Səfərov tərəfindən qətlə yetirilib.

13 aprel 2006-cı ildə Budapeştin birinci instansiya məhkəməsi Səfərovu 30 il ərzində əfv hüququ olmadan ömürlük həbs cəzasına məhkum edib. 2007-ci ilin fevralında Apellyasiya Məhkəməsi hökmü qüvvədə saxlayıb. -02D-